İstehlakçıların “Elektrik enerjisindən istifadə qaydaları”na riayət etmələrinin yoxlanılması istiqamətində reydlər keçirilir. Aşkar edilmiş pozuntuların qarşısı vaxtında alınır və həmin istehlakçılar barəsində müvafiq tədbirlər görülür.

“Azərenerji” ASC-nin Mətbuat xidmətinə “Samux” elektrik şəbəkəsindən (EŞ) daxil olan məlumata görə, cari ilin iyun ayında müəssisənin xidməti ərazisində həyata keçirilmiş reydlər zamanı 55 istehlakçının elektrik enerjisindən istifadə qaydalarını pozması faktı aşkar edilmişdir. Aşkar edilmiş qayda pozuntularına əsasən tərtib edilmiş aktlar üzrə müvafiq qaydada hesabatlar aparılaraq 1 milyon 87,6 min  kilovatsaata yaxın itirilmiş elektrik enerjisinin 65,2 min manatdan artıq istehlak dəyəri bərpa edilmişdir.

Qeyd edək ki, cari ilin 6 ayı ərzində isə sözügedən müəssisə üzrə 240-dan artıq qayda pozuntusu aktı tərtib olunmuş, 2 milyon 891,9 min kilovatsaatdan artıq itirilmiş elektrik enerjisinin 173,5 min manatdan çox istehlak dəyəri bərpa edilmişdir. Həyata keçirilmiş müvafiq tədbirlər nəticəsində həmin bu məbləğlə yanaşı ötən ildən akta görə yaranmış debitor borcun da müəyyən hissəsinin ödənişi təmin edilmiş və qalan hissənin ödənilməsi istiqamətində isə müvafiq tədbirlər həyata keçirilir. Yeri gəlmişkən, cari ilin iyun ayında üç istehlakçı barəsində müvafiq tədbirlərin görülməsi üçün hüquq mühafizə orqanlarına müraciət edilmişdir.

İstehlakçıların dayanıqlı və keyfiyyətli elektrik enerjisi ilə təmin edilməsi, sayğac uçot komplektinin “Elektrik enrjisindən istifadə qaydaları”na uygun xüsusi qutularda, baxış üçün maneəsiz yerdə  quraşdırılması və digət təşkilatı tədbirlərlə bağlı şəbəkələrdə aparılan yenidənqurma işlərindən söz açan mənbə bildirdi ki, cari ilin son üç ayı ərzində 4,1 kilometrdən artıq 10, 6 və 0,4 kV-lik EVX təmir olunmuş, 20-yə yaxın dayaq dəyişdirilmişdir. Eyni zamanda 23 transformator məntəqəsində müxtəlif təyinatlı təmir işləri həyata keçirilmiş və müxtəlif gücdə 5 transformator da təmir edilərək istifadəyə verilmişdir.

Mənbə onu da bildirdi ki, cari ilin iyun ayında müəssisə üzrə 8,9 milyon kilovatsaatdan artıq elektrik enerjisi istehlak edilmişdir. Bu da ötən ilin müvafiq dövrü ilə müqayisədə 1,7 milyon kilovatsaata yaxın azdır.  İstehlak edilmiş elektrik enerjisinin dəyərinin ödənişi isə ötən ilin eyni dövründəki göstərici ilə müqayisədə mütləq 19 faizdən çox artmışdır. O cümlədən, daimi əhali istehlakçı qrupunda isə istehlak ötən ilin müvafiq dövrü ilə müqayisədə 123 min kilovatsaata yaxın azalaraq 1,6 milyon kilovatsaatdan artıq olmuşdur.

Onu da qeyd edək ki, cari ilin 6 ayı ərzində müəssisə üzrə istehlak ötən ilin müvafiq dövrü ilə müqayisədə 290 min kilovatsaata yaxın azalaraq 50,7 milyon kilovatsaatdan artıq olmuşdur. Ödəniş isə ötən ilin müvafiq dövrü ilə müqayisədə mütləq 9 faizə yaxın artmışdır. O cümlədən, daimi əhali istehlakçı qrupu üzrə istehlak ötən ilin müvafiq dövrü ilə müqayisədə 1.3 milyon kilovatsaatdan çox azalaraq 11 milyon kilovatsaata yaxın olmuşdur. Ödənişdə mütləq artım isə 11 faizdən çox olmuşdur.

Şəbəkədən verilən məlumata istinadən, yerinə yetirilən və hazırda davam etdirilən təmir-bərpa işləri rayonun enerji təhlükəsiziliynin yüksək səviyyədə təmin edilməsi istiqamətində atılan mühüm addımdır və bu işlər davamlı olaraq yerinə yetiriləcəkdir.