Ölkəmizin enerji sistemində həyata keçirilən məqsədyönlü tədbirlər, yeni texnologiyaların tətbiqi ilə aparılan quruculuq işləri  istehlakçıların dayanıqlı  və keyfiyyətli elektrik enerjisi ilə təminatını daha da yaxşılaşdırmağa imkan verir. Texniki-iqtisadi göstəricilərin səviyyəsinin yüksəldilməsini, o cümlədən  elektrik enerjisinin dayanıqlı ötürülməsini təmin etmək üçün nəzərdə tutulan texniki tədbirlər cari ilin son üç ayında da davam etdirilmişdir. Bütün elektrik energetika müəssisələrində olduğu kimi “Abşeron Regional Elektrik Şəbəkəsi”nin (REŞ) əmək kollektivi də qarşıya qoyulmuş vəzifələri vaxtında və layiqincə yerinə yetirmək üçün səylə çalışır.

Müəssisədən “Azərenerji” ASC-nin Mətbuat xidmətinə daxil olan məlumata əsasən yendənqurma işləri müəssisənin balans mənsubiyyətinə aid olan hava elektrik verilişi xətlərindən  (HEVX) də yan ötməmişdir. Belə ki, 220 kV-lik I “Şirvan” və “Səngəçal” EVX-də yenidənqurma işləri qrafik üzrə davam etdirilib başa çatdırılmışdır.  Hazırda 110 kV-lik I-II “Qala”, “Dübəndi” HX-də analoji işlər davam etdirilir.

Qeyd edək ki, layihə əsasında 220 kV-lik “Ağsu”, “Qəbələ” HX-lərində də yenidənqurulma işləri aparılır. Eyni zamanda “Səngəçal ES” ilə 220 kV-lik “Müşviq” yarımstransiyası arasında 110 kV-lik iki dövrəli HX-nin tikinti işləri davam etdirilir. Bütün bunlarla yanaşı sözügedən dövrdə 500 kV-lik II “Abşeron”, 330 kV-lik I və VIII “Abşeron”, IV “Şirvan”  HX-lərində də müxtəlif təyinatlı təmir işləri davam etdirilmişdir. Yeri gəlmişkən, 110 kV-lik II-III “Şimal” HX-də iki dayaq arası hissə kabel xəttinə keçirilmişdir.

Mənbədən əldə etdiyimiz digər bir məlumata əsasən, müəssisənin xidməti ərazisində olan 220 kV-lik “Zabrat” yarımstansiyasının tikinti işləri tam başa çatmaq üzrədir. 220 kV-lik “Böyük Şor” yarımstansiyasının tikintisi isə davam etdirilir. Eyni zamanda 220 kV-lik “Hövsan” yarımstansiyasında aparılan yenidənqurma işləri çərçivəsində 110 kV-lik eleqaz açarı, gərginlik və cərəyan transformatorun quraşdırılması işləri də davam etdirilir.

Mənbənin verdiyi məlumata əsasən, sadalanan tədbirlərin yerinə yetirilməsi enerji təsərrüfatlarının daha da dayanıqlı fəaliyyətinə zəmanət verən əsas amillərdəndir. Bunu nəzərə alaraq Şəbəkədən yenidənqurma işlərinin davam etdirilməsinin gündəlikdə duran əsas tapşırıqlardan biri olduğu bildirildi.

Mənbədən o da bildirilir ki, mövcud hava şəraitinin mənfi fəsadları nəzərə alınaraq qabaqlayıcı tədbirlər həyata keçirilmişdir.  Məsələn, müvafiq su hovuzları su ilə doldurulur, köpük əmələ gətirən maddələr çənlərə qablaşdırılaraq saxlanılır.  Bundan əlavə, yağ tutumlu avadanlıqların yağ sızmalarının qarşısı vaxtında alınır, yanğın əleyhinə tədbirlər görülür. Şəbəkə rayonlarında növbətçi heyətin yanğına qarşı hazırlığını artırmaq məqsədilə  xüsusi təlimlər keçirilir.

Hazırda analoji tədbirlərin davam etdirildiyini bildirən  mənbə onu da vurğuladı ki, bütün bunlar yarımstansiyaların, elektrik verilişi xətlərinin qəzasız və dayanıqlı işləməsi üçün əsas şərtdir.