Yüksək dağlıq relyefə malik Balakən rayo­nu ərazisində elektrik enerjisi təminatında keyfiyyət və dayanıqlılıq daha da artırılmışdır. Hazır­da rayon elektrik şəbəkəsində yay möv­sümü ilə əlaqədar nəzərdə tutulan tədbirlər planının icrası davam etdirilir. “Balakən Elektrik Şəbəkəsi”n­dən “Azərenerji” ASC-nin  Mətbuat xidmətinə daxil olan məlumata görə, bu ilin son üç ayı ərzində 10 kV-lik “Sənaye”, “Qazbinə”, “Katex”, “Qazma” və digər elektrik verilişi xətlərinin 2,3 km-dən artıq hissəsi təmir edilmişdir. Eyni zamanda 0,4 kV-lik ­elektrik verilişi xətlərinin 3,8 kilometrə yaxın hissəsi də təmir olunmuşdur.  Qeyd edək ki, elektrik enerjisi ilə təminatda dayanıqlığın təmin edilməsi məqsədilə transformator məntəqələrində (TM) də təmir işləri aparılıb. O cümlədən, TM-lərin 30-dan çoxunda müxtəlif təyinatlı təmir işləri həyata keçirilmişdir.

Mənbə onu da bildirdi ki, cari ilin may ayında müəssisənin xidməti ərazisində keçirilmiş reydlər zamanı 28 istehlakçının elektrik enerjisindən istifadə qaydalarını pozması faktı aşkar edilmişdir. Aşkar edilmiş qayda pozuntuları müvafiq qaydada aktlaşdırılmış və 80 min  kilovatsaatdan artıq itirilmiş elektrik enerjisinin 4,8 min manatdan çox istehlak dəyəri bərpa edilmişdir.

Yeri gəlmişkən, cari ilin 5 ayı ərzində müəssisənin xidməti ərazisində keçirilmiş reydlər zamanı 150-ə yaxın istehlakçının sayğac uçot komplektində qüsur aşkar edilmişdir. Aşkar edilmiş qayda pozuntuları müvafiq qaydada aktlaşdırılmış və 322,1 min  kilovatsaatdan artıq itirilmiş elektrik enerjisinin 19,3 min manatdan çox istehlak dəyəri bərpa edilmişdir. Həyata keçirilən müvafiq tədbirlər nəticəsində həmin bu məbləğin 54 faizə yaxın hissəsinin ödənişi təmin edilmiş və qalan hissənin ödənilməsi istiqamətində isə müvafiq tədbirlər həyata keçirilir.

Mənbədən əldə etdiyimiz digər bir məlumata görə, cari ilin may ayında müəssisə üzrə 3,4 milyon kilovatsaatdan artıq elektrik enerjisi istehlak edilmişdir. Bu da ötən ilin müvafiq dövrü ilə müqayisədə 298 min kilovatsaat çoxdur.  İstehlak edilmiş elektrik enerjisinin dəyərinin ödənişi isə ötən ilin eyni dövründəki göstərici ilə müqayisədə mütləq 15 faizdən çox artmışdır. O cümlədən, daimi əhali istehlakçı qrupunda isə istehlak ötən ilin müvafiq dövrü ilə müqayisədə 68 min kilovatsaata yaxın artaraq 2.2 milyon kilovatsaata yaxın, ödənişdə  mütləq artım isə 7 faizə yaxın olmuşdur.

Onu da qeyd edək ki, cari ilin beş ayı ərzində müəssisə üzrə istehlak ötən ilin müvafiq dövrü ilə müqayisədə 1,3 milyon kilovatsaata yaxın artaraq 18 milyon kilovatsaata yaxın olmuşdur. Ödəniş isə ötən ilin müvafiq dövrü ilə müqayisədə mütləq 14 faizə yaxın artmışdır. O cümlədən, daimi əhali istehlakçı qrupu üzrə istehlak ötən ilin müvafiq dövrü ilə müqayisədə 171 min kilovatsaata yaxın artaraq 11,2 milyon kilovatsaata yaxın olmuşdur. Ödənişdə mütləq artım isə 10 faizə yaxın olmuşdur.

Sonda onu da qeyd edək ki, şəbəkədə əməyin mühafizəsi məsələləri də diqqət mərkəzindədir. İşçilərin peşəkarlıq səviyyələrinin yüksəldilməsinə daim diqqət yetirilir.  Onlar texniki təhlükəsizlik və əməyin mühafizəsi ilə bağlı mütəmadi olaraq təlimatlandırılırlar.