Ötürücü infrastrukturun səmərəli fəaliyyətinin təmin edilməsi elektrik enerjisinin istehlakçılara dayanıqlı şəkildə və keyfiyyətlə çatdırılması üçün mühüm şərtdir. Bu məqsədlə digər elektrik şəbəkələrində olduğu kimi, Naftalan şəhərində də görülən işlərin həcmi xeyli genişləndirilib. Bu haqda “Naftalan Elektrik Şəbəkəsi”ndən “Azərenerji” ASC-nin Mətbuat xidmətinə verilən məlumata görə, istehlakçıların elektrik enerjisi təchizatının yaxşılaşdırılması ilə bağlı ardıcıl tədbirlər davam etdirilir. Belə ki, elektrik enerjisi ilə təminatda dayanıqlığın daha da möhkəmləndirilməsi məqsədi ilə elektrik verilişi xətlərində və transformator məntəqələrində əsaslı və cari təmir işləri aparılıb. Bu məqsədlə bu ilin son üç ayı ərzində 10 kV-lik xətlərdə “Şəfibəyli”, I-II “Sanatoriya” HX-lərində müxtəlif təyinatlı təmir işləri həyata keçirilmiş, o cümlədən naqillər dartılmış, dayaqlar düzləndirilmiş, 1,1 km-ə yaxın xəttdə və  iki TM-də əsaslı və cari təmir işləri görülmüşdür. Bununla yanaşı, TM-lərin əraziləri otlardan təmiz­lənib, ilkin yanğınsöndürmə va­si­tələrinə baxışlar keçirilib, inventarların saxlanma qaydaları yox­lanılıb. Qeyd edək ki, hazırda yay mövsümü ilə əlaqədar tədbirlər planı davam etdirilir.

Mənbə onu da bildirdi ki, şəbəkənin xidməti ərazisində sayğacdankənar istifadə hallarına da təsadüf edilir. Aşkar olunan faktlar üzrə akt tərtib olunur. Görülən tədbirlər nəticəsində elektrik enerjisindən qeyri-qanuni istifadə edənlərin sayı getdikcə azalır. Belə ki, cari ilin 5 ayı ərzində müəssisənin xidməti ərazisində keçirilmiş reydlər zamanı 3 istehlakçının (bunun 2-si məişət abonenti (əhali) istehlakçıları qrupuna aiddir) sayğac uçot komplektində qüsur aşkar edilərək 12,7 min kilovatsaata yaxın (bunun 10 min kilovatsaatdan çoxu məişət abonenti (əhali) istehlakçıları qrupuna aiddir) itirilmiş elektrik enerjisinin 762 manata yaxın istehlak dəyəri bərpa edilmişdir. Həyata keçirilən müvafiq tədbirlər nəticəsində həmin bu məbləğin müəyyən hissəsinin ödənişi təmin edilmiş və qalan hissənin ödənilməsi istiqamətində isə müvafiq tədbirlər həyata keçirilir.

Yeri gəlmişkən, cari ilin may ayında müəssisə üzrə 872 min kilovatsaatdan artıq elektrik enerjisi istehlak edilmişdir. Bu da ötən ilin müvafiq dövrü ilə müqayisədə 8,2 min kilovatsaat çoxdur.  O cümlədən, daimi əhali istehlakçı qrupunda isə istehlak ötən ilin müvafiq dövrü ilə müqayisədə 16,1 min kilovatsaat artaraq 253 min kilovatsaatdan çox, ödənişdə  mütləq artım isə 5 faizə yaxın olmuşdur.

Sonda onu da qeyd edək ki, cari ilin beş ayı ərzində müəssisə üzrə istehlak ötən ilin müvafiq dövrü ilə müqayisədə 77 min kilovatsaata yaxın azalaraq 5,3 milyon kilovatsaatdan artıq olmuşdur. Ödəniş isə ötən ilin müvafiq dövrü ilə müqayisədə mütləq 5 faizdən çox artmışdır. O cümlədən, daimi əhali istehlakçı qrupu üzrə istehlak ötən ilin müvafiq dövrü ilə müqayisədə 89 min kilovatsaata yaxın artaraq 1,5 milyon kilovatsaata yaxın olmuşdur. Ödənişdə mütləq artım isə 7 faizdən çox olmuşdur.

Onu da qeyd etmək yerinə düşərdi ki, işçilərin peşəkarlıq səviyyələrinin yüksəldilməsinə daim diqqət yetirilir. Bunun üçün mütəmadi olaraq əks-qəza məşqləri, müxtəlif treninqlər keçirilir. Əməyin mühafizəsi və texniki təhlükəsizlik məsələləri də arzuolunan səviyyədədir. İşçilər bu məqsədlə mütəmadi olaraq təlimatlandırılırlar.