İstehlakçıların keyfiyyətli və dayanıqlı elektrik enerjisi ilə təmin edilməsi məqsədilə ölkə ərazisində fəaliyyət göstərən enerji təsərrüfatlarında ənənəvi təmir-bərpa işləri yerinə yetirilir. “Azərenerji” ASC-nin Mətbuat xidmətinə “Ucar Elektrik Şəbəkəsi”ndən (EŞ) daxil olan məlumata görə, müəssisənin xidməti ərazisində mövsümə hazırlıq məqsədilə bir sıra təmir işləri yerinə yetirilib. O cümlədən, cari ilin son üç ayı ərzində 6-10/0,4 kV-lik 68 transformator məntəqəsində (TM) müxtəlif təyinatlı təmir işləri həyata keçirilmiş, transformatorlara yağ əlavə edilmişdir.

Qeyd edək ki, 10, 6 və 0,4 kV-lik hava elektrik verilişi xətlərində də əsaslı və cari təmir işləri aparılmış, istismara yararsız naqillər yeniləri ilə əvəz edilmişdir. Nəticədə 2,8 kilometrə yaxın naqil dəyişdirilmiş, 2 kilometr yeni xətt çəkilmiş, 16 dayaq yenisi ilə əvəzlənmiş və 9,7 kilometrə yaxın xəttdə isə müxtəlif təyinatlı təmir işləri həyata keçirilmişdir.

Mənbə onu da bildirdi ki, cari ilin may ayında müəssisə üzrə 4,9 milyon kilovatsaatdan artıq elektrik enerjisi istehlak edilmişdir. Bu da ötən ilin müvafiq dövrü ilə müqayisədə 379 min kilovatsaata yaxın azdır. O cümlədən, daimi əhali istehlakçı qrupunda isə istehlak ötən ilin müvafiq dövrü ilə müqayisədə 220 min kilovatsaata yaxın azalaraq 2.3 milyon kilovatsaatdan artıq olmuş, ödənişdə  isə mütləq artım 9 faiz təşkil etmişdir.

Onu da qeyd edək ki, cari ilin beş ayı ərzində müəssisə üzrə istehlak ötən ilin müvafiq dövrü ilə müqayisədə 1,3 milyon kilovatsaatdan çox azalaraq 30,5 milyon kilovatsaata yaxın olmuşdur. Ödəniş isə ötən ilin müvafiq dövrü ilə müqayisədə mütləq 3 faizə yaxın artmışdır. O cümlədən, daimi əhali istehlakçı qrupu üzrə istehlak ötən ilin müvafiq dövrü ilə müqayisədə 881 min kilovatsaatdan çox azalaraq 13,4 milyon kilovatsaata yaxın olmuşdur. Ödənişdə mütləq artım isə 14 faizə yaxın təşkil etmişdir.

Mənbədən əldə etdiyimiz digər bir məlumatda o da qeyd edilir ki, cari ilin may ayında müəssisənin xidməti ərazisində keçirilmiş reydlər zamanı 26 istehlakçının (bunun 21-i məişət abonenti (əhali) istehlakçıları qrupuna aiddir) elektrik enerjisindən istifadə qaydalarını pozması faktı aşkar edilmişdir. Aşkar edilmiş qayda pozuntuları müvafiq qaydada aktlaşdırılmış və 137,2 min  kilovatsaatdan artıq (bunun 95 min kilovatsaatdan çoxu məişət abonenti (əhali) istehlakçıları qrupuna aiddir) itirilmiş elektrik enerjisinin 8,2 min manatdan artıq istehlak dəyəri bərpa edilmişdir.

Onu da qeyd etmək yerinə düşərdi ki, cari ilin 5 ayı ərzində isə müəssisənin xidməti ərazisində keçirilmiş reydlər zamanı 178 istehlakçının (bunun 147-si məişət abonenti (əhali) istehlakçıları qrupuna aiddir) sayğac uçot komplektində qüsur aşkar edilərək 751,2 min kilovatsaatdan artıq (bunun 532,7 min kilovatsaata yaxını məişət abonenti (əhali) istehlakçıları qrupuna aiddir) itirilmiş elektrik enerjisinin 45,1 min manata yaxın istehlak dəyəri bərpa edilmişdir. Həyata keçirilən müvafiq tədbirlər nəticəsində həmin bu məbləğlə yanaşı, ötən illərdə aktlara görə yaranmış debitor borcun da müəyyən hissəsinin  ödənişi təmin edilmişdir

Yeri gəlmişkən qayda pozuntularının təsnifatı barədə əldə etdiyimiz məlumata istinadən bildirək ki,  elektrik enerjisindən yenə də kənar xətt vasitəsilə istifadə edilməsi halı üstünlük təşkil etmişdir.