“Mingəçevir Regional Elektrik Şəbəkəsi”nin (REŞ) idarəetmə strukturuna daxil olan   EŞ-lərdə istehlakçıları daha da dayanıqlı və keyfiyyətli elektrik enerjisi ilə təmin etmək məqsədilə geniş həcmli yenidənqurma, eyni zamanda əsaslı və cari təmir işləri həyata keçirilmişdir. O cümlədən, cari ilin son üç ayı ərzində Kür çayının kənarında aparılan yenidənqurma işləri ilə əlaqədar 6 kV-lik 21 saylı hava xəttinin (HX) müəyyən hissəsi kabel xəttinə keçirilmiş, şəhərin dəniz yolu ərazisində aparılan abadlıq və yenidənqurma işləri çərçivəsində həmin ərazidə 0,4 kV-lik hava xəttinin də müəyyən hissəsi kabel xətti ilə əvəzlənmişdir.

“Mingəçevir” elektrik şəbəkəsindən (EŞ) “Azərenerji” ASC-nin Mətbuat xidmətinə daxil olan məlumata görə, cari ilin son üç ayı ərzində müəssisənin xidməti ərazisində 1,3 kilometrə yaxın uzunluğunda 10 və 0,4 kV-lik EVX dəyişdirilmiş, eyni gərginlikli xətlərin 5 ədəd dayağı yenisi ilə əvəzlənmiş, xeyli sayda traves quraşdırılmış, izolyatorlar dəyişdirilmiş və 3,7 kilometrə yaxın EVX-də isə əsaslı və cari təmir işləri həyata keçirilmişdir. Eyni zamanda 1,4 kilometrdən artıq müxtəlif markalı kabel xətti çəkilmişdir.

Qeyd edək ki, sözügedən dövrdə 10 transformator məntəqəsində (TM) müxtəlif təyinatlı təmir işləri həyata keçirilmişdir.

Mənbədən onu da bildirdilər ki, yenidənqurma və təmir işləri qrafikə uyğun davam etdirilir. Görülmuş və görüləcək işlər şəbəkənin dayanıqlığının daha da möhkəmləndirilməsi ilə yanaşı, elektrik enerjisindən qeyri qanuni istifadə hallarının qarşısının alınmasında əhəmiyyətli rol oynayır. Belə ki, cari ilin may ayında müəssisənin xidməti ərazisində keçirilmiş reydlər zamanı 6 istehlakçının (bunun 3-ü məişət abonenti (əhali) istehlakçılarına aiddir) elektrik enerjisindən istifadə qaydalarını pozması faktı aşkar edilmişdir. Aşkar edilmiş qayda pozuntuları müvafiq qaydada aktlaşdırılmış və 52,6 min  kilovatsaata yaxın (bunun 14,2 min kilovatsaatdan çoxu məişət abonenti (əhali) istehlakçılarına aiddir) itirilmiş elektrik enerjisinin 3,2 min manata yaxın istehlak dəyəri bərpa edilmişdir.

Onu da qeyd edək ki, 2013-cü ilin 5 ayı ərzində keçirilmiş reydlər zamanı isə 164 istehlakçının (bunun 150-ə yaxını məişət abonenti (əhali) istehlakçılarına aiddir) sayğac uçot komplektində qüsur aşkar edilərək 3 milyon 853,8 min kilovatsaatdan artıq (bunun 3 milyon 744,2 min kilovatsaata yaxını məişət abonenti (əhali) istehlakçılarına aiddir) itirilmiş elektrik enerjisinin 231,2 min manatdan artıq istehlak dəyəri bərpa edilmişdir. Həyata keçirilən müvafiq tədbirlər nəticəsində həmin bu məbləğin 20 faizə yaxın hissəsinin ödənişi təmin edilmiş və qalan hissənin ödənilməsi istiqamətində isə müvafiq tədbirlər həyata keçirilir.

Mənbədən əldə etdiyimiz digər bir məlumata görə, cari ilin may ayında müəssisə üzrə 9,5 milyon kilovatsaatdan artıq elektrik enerjisi istehlak edilmişdir. Bu da ötən ilin müvafiq dövrü ilə müqayisədə 150 min kilovatsaat çoxdur.  İstehlak edilmiş elektrik enerjisinin dəyərinin ödənişi isə ötən ilin eyni dövründəki göstərici ilə müqayisədə mütləq artmışdır. O cümlədən, daimi əhali istehlakçı qrupunda isə istehlak ötən ilin müvafiq dövrü ilə müqayisədə 114 min kilovatsaata yaxın azalaraq 2,9 milyon kilovatsaatdn artıq, ödənişdə  mütləq artım isə 5 faizdən çox olmuşdur.

Onu da qeyd etmək yerinə düşərdi ki, cari ilin beş ayı ərzində müəssisə üzrə istehlak ötən ilin müvafiq dövrü ilə müqayisədə 680 min kilovatsaata yaxın azalaraq 60,4 milyon kilovatsaatdan artıq olmuşdur.

Ödəniş isə ötən ilin müvafiq dövrü ilə müqayisədə mütləq artmışdır. O cümlədən, daimi əhali istehlakçı qrupu üzrə istehlak ötən ilin müvafiq dövrü ilə müqayisədə 379 min kilovatsaata yaxın azalaraq 20,6 milyon kilovatsaata yaxın olmuşdur.