Digər müəssisələr kimi «Gəncə Regional Elektrik Şəbəkəsi»nin tərkibindəki elektrik şəbəkələrində də yay təmir kampaniyasının qızğın çağıdır. Sərt qışın sınağından uğurla çıxan təmirçilər elektrik avadanlıqlarının dayanıqlığı üçün zəruri olan tədbirləri həyata keçirir-  transformator məntəqələrində, yarımstansiyalarda və elektrik verilişi xətlərində cari və əsaslı təmir işlərini tərtib edilmiş tədbirlər planına uyğun yerinə yetirirlər.

“Gəncə Elektrik Şəbəkəsi”ndən “Azərenerji” ASC-nin Mətbuat xidmətinə daxil olan məlumata görə, havanın istiləşməsi ilə əlaqədar EVX-lərdə, transformator məntəqələrində, elə­cə də yarımstansiyaların ərazilərində son vaxtlar xeyli işlər görülüb. Yeni tikililərin SİP kabeli, dayaq və sayğaclarla təminatı yaxşılaşdırılıb. O cümlədən, cari ilin son üç ayı ərzində 5,3 kilometr 0,4 kV-lik SİP kabeli çəkilmiş, 650-ə yaxın smartkart tipli sayğac quraşdırılmış, 70-ə yaxın dayaq quraşdırılmışdır.

Mənbəyə istinadən qeyd edək ki, müəssisənin balans mənsubiyyətinə aid olan 6 kV-lik xətlərin 11,2 km-i yeraltı kabel xəttinə keçirilmiş, 115-dən artıq transformator məntəqəsi, bir km-dən artıq 6-10 kV-lik elektrik verilişi xətti təmirdən çıxarılmış və ümumi gücü 1,8 MVA-ya yaxın olan üç transformator da əsaslı təmir olunaraq istehlakçıların istifadəsinə verilmişdir.

Qarşıda duran təmir kampaniyası aylarında sözügedən müəssisədə istehlakçılara daha da keyfiyyətli və dayanıqlı elektrik enerjisi verilməsini təmin etmək üçün zəruri addımlar atılacaq. Bu isə istehlak olunan elektrik enerjisinin ödənmə faizinin yüksəlməsində mühüm amildir”, – deyən mənbə onu da bildirdi ki, cari ilin may ayında müəssisənin xidmət ərazisində 96 milyon kilovatsaatdan artıq elektrik enerjisi istehlak edilmişdir. Nətisədə ötən ilin müvafiq dövrü ilə müqayisədə istehlak 2,1 milyon kilovatsaata yaxın azalmış, ödəniş isə 12 faizdən çox mütləq artmışdır. O cümlədən, daimi əhali istehlakçı qrupu üzrə istehlak ötən ilin müvafiq dövrü ilə müqayisədə 830 min kilovatsaatdan çox artaraq 9,9 milyon kilovatsaata yaxın olmuş, ödəniş isə ötən ilin müvafiq dövrü ilə müqayisədə mütləq 9 faizdən çox artmışdır.

Yeri gəlmişkən, cari ilin 5 ayı ərzində isə burada 493,2 milyon  kilovatsaatdan artıq elektrik enerjisi istehlak edilib ki, bu da ötən ilin müvafiq dövründəki istehlakdan 9,5 milyon kilovatsaat azdır. Ötən ilin müvafiq dövrü ilə müqayisədə ödəniş 7 faizə yaxın mütləq artmışdır. O cümlədən, daimi əhali istehlakçı qrupu üzrə istehlak ötən ilin müvafiq dövrü ilə müqayisədə 2,7 milyon kilovatsaat artaraq 59,8 milyon kilovatsaatdan artıq olmuşdur. Ödəniş isə  ötən ilin eyni dövründəki göstəricidən mütləq 5 faizə yaxın çoxdur.

Mənbəyə istinadən onu da qeyd edək ki, cari ilin may ayında keçirilmiş reydlər zamanı 4 qayda pozuntusu aşkar edilərək müvafiq qaydada aktlar tərtib edilmişdir. Nəticədə 7,1 min kilovatsaata yaxın, daha doğrusu 425 manatdan artıq itirilmiş elektrik enerjisinin istehlak dəyəri bərpa edilmişdir.

Onu da qeyd etmək yerinə düşərdi ki, cari ilin 5 ayı ərzində  burada 30 qayda pozuntusu aşkar edilərək 335 min kilovatsaata yaxın itirilmiş elektrik enerjisinin 20,1 min manata yaxın istehlak dəyəri bərpa edilmişdir. Həyata keçirilmiş müvafiq tədbirlər nəticəsində həmin bu məbləğin 48 faizdən artıq hissəsinin ödənişi təmin edilmiş və qalan hissənin ödənilməsi üçün müvafiq tədbirlər görülür.

Qayda pozuntularının xarakterindən və istehlakçı qrupu üzrə təsnifatından söz açan mənbə elektrik enerjisindən yenə də kənar xətt vasitəsilə istifadə edilməsi halının üstünlük təşkil etdiyini və ən çox qayda pozuntusunun  məişət abonenti (əhali) istehlakçı qrupunda aşkar edildiyini bildirdi.