Son illər “Biləsuvar Elektrik Şəbəkəsi”nin (EŞ) enerji təsərrüfatında görülən tədbirlər öz müsbət nəticəsini verməkdədir. Rayonun bütün istehlakçı qrupları sutka ərzində daha keyfiyyətli və dayanıqlı elektrik enerjisi ilə təmin olunurlar.

Biləsuvar EŞ-dən “Azərenerji” ASC-nin Mətbuat xidmətinə daxil olan məlumata görə, elektrik enerjisi ilə təminatda dayanıqlığın daha da möhkəmləndirilməsi məq­sədilə transformator məntəqələrində (TM) və EVX-lərdə əsas­lı və cari təmir işləri aparılıb. O cümlədən, bu ilin son üç ayı ərzində müəssisənin xidməti ərazisində aparılan yenidənqurma işləri zamanı 10 kV-lik xətlərin 7,7 kilometrində, 0,4 kV-lik xətlərin isə 4,3 kilometrində müxtəlif təyinatlı təmir işləri, həmçinin istismar səviyyəsini yüksəltmək üçün digər  tədbirlər də həyata keçirilmişdir.

Qeyd edək ki, sözügedən dövrdə 20-dən artıq TM-də müxtəlif təyinatlı təmir işləri reallaşdırılmış, ümumi gücü 1,5 MVA-ya yaxın olan 5 transformator da əsaslı təmir edilərək tam işlək vəziyyətə gətirilmişdir. Eyni zamanda bütün TM-lərin ərazisi quru otlardan təmizlənib, transformatorların yağ tutumlu avadanlıqlarında yağın səviyyəsi normal səviyyəyə çatdırılıb, həmçinin yağ sızmalarının qarşısı alınmışdır.

Mənbə onuda bildirdi ki, hazırda istehlakçıların elektrik enerjisi təchizatının daha da yaxşılaşdırılması ilə bağlı mühüm tədbirlər davam etdirilir.

Onu da qeyd edək ki, müəssisənin xidməti ərazisində elektrik enerjisindən qeyri-qanuni istifadə hallarına təsadüf edilir. Belə ki, bu ilin my ayında 30 qayda pozuntusu aşkar edilərək akt tərtib olunmuş,  326,3 min kilovatsaata yaxın iti­rilmiş elektrik enerjisinin 19,6 min manata yaxın istehlak dəyəri bər­pa edilmişdir. Həyata keçirilən müvafiq tədbirlər nəticəsində həmin məb­ləğin 55 faizə yaxın his­səsinin ödənişi təmin edilmişdir.

Mənbəyə istinadən onu da qeyd edək ki, cari ilin ötən 5 ayı ərzində isə burada 214 qayda pozuntusu aşkar edilərək akt tərtib olunmuşdur. Aktlar üzrə müvafiq qaydada hesabat aparılaraq 1 milyon 508,6 min kilovatsaata yaxın itirilmiş elektrik enerjisinin 90,5 min manatdan artıq istehlak dəyəri bərpa edilmişdir. Həyata keçirilən müvafiq tədbirlər nəticəsində həmin bu məbləğin 27 faizə yaxın hissəsinin ödənişi təmin edilmiş və qalan hissənin ödənilməsi istiqamətində isə müvafiq tədbirlər həyata keçirilir.

Yeri gəlmişkən, cari ilin may ayında müəssisə üzrə 8,9 milyon kilovatsaatdan artıq elektrik enerjisi istehlak edilmişdir. Bu da ötən ilin müvafiq dövrü ilə müqayisədə 1,9 milyon kilovatsaat çoxdur.  İstehlak edilmiş elektrik enerjisinin dəyərinin ödənişi isə ötən ilin eyni dövründəki göstərici ilə müqayisədə çox yüksəkdir. O cümlədən, daimi əhali istehlakçı qrupunda isə istehlak ötən ilin müvafiq dövrü ilə müqayisədə 258 min kilovatsaata yaxın azalaraq 2,4 milyon kilovatsaata yaxın olmuş, ödənişdə  mütləq artım isə 22 faizə yaxın təşkil etmişdir.

Sonda onu da qeyd edək ki, cari ilin beş ayı ərzində müəssisə üzrə istehlak ötən ilin müvafiq dövrü ilə müqayisədə 4,4 milyon kilovatsaat artaraq 38,2 milyon kilovatsaata yaxın olmuşdur. Ödəniş isə ötən ilin müvafiq dövrü ilə müqayisədə mütləq 31 faizə yaxın artmışdır. O cümlədən, daimi əhali istehlakçı qrupu üzrə istehlak ötən ilin müvafiq dövrü ilə müqayisədə 1,4 milyon kilovatsaatdan çox azalaraq 18,2 milyon kilovatsaata yaxın olmuşdur. Ödənişdə mütləq artım isə 10 faizdən çox olmuşdur.