“Mingəçevir REŞ”-in struktur tərkibində fəaliyyət göstərən “Naftalan Elektrik Şəbəkəsi” özünün texniki-iqtisadi göstəricilərini aybaay yaxşılaşdırır. Müəssisə regional şəbəkənin nümunəvi obyektlərindən biridir.

“Azərenerji” ASC-nin Mətbuat xidmətinə şəbəkənin məsul işçisinin verdiyi məlumata görə, son aylar şəbəkənin 10 kV-lik elektrik veriliş xətlərində 1,7 km uzunluğunda əsaslı və cari təmir işləri görülüb. Kollektivin təmsilçiləri öz qüvvələri ilə 0,4 kV-lik EVX-lərdə də iki km-ə yaxın hissədə analoyi işlər həyata keçiriblər. Şəbəkənin xidməti ərazisində fəaliyyət göstərən beş yarımstansiyada da müvafiq tədbirlər başa çatdırılıb. Yeni ünvanlara 27 ədəd bir fazlı smart-kart tipli sayğac quraşdırılıb.

Qeyd edək ki, kurort şəhərciyi olan Naftalanda 2,4 minə yaxın fərdi əhaliyə, 350-ə yaxın qeyri-əhali sektoruna fasiləsiz, keyfiy­yətli və dayanıqlı enerji verilir. Son vaxtlar Naftalan ərazisində təbiətin göstərdiyi «şıltaqlıq» şəbəkənin işinə mənfi təsir göstərə bilməyib. Bu isə kollektivin davamlı olaraq apardığı profilaktik tədbirlərin müsbət nəticəsidir.

Bütün bunlar Naftalan Elektrik Şəbəkəsinin ümumi fəaliyyətinə də müsbət təsirini göstərir. Şə­bəkədə, demək olar ki, enerji itkisi, enerji oğurluğu yox dərəcəsindədir. Cari ilin əvvəllərindən kollektiv uğurlarını artırır və son məqsədə – enerji haqlarının tam şəkildə ödənilməsinə çalışır.