Ölkə enerji təsərrüfatının bütün sahələrində  olduğu  kimi, “Qobustan” elektrik şəbəkəsində  (EŞ) də istehlakçıların elektrik enerjisi təchizatının daha da yaxşılaşdırılması  məqsədilə son üç ay ərzində transformator məntəqələrində və elektrik verilişi xətlərində (EVX) ərzində bir sıra  təmir işləri aparılıb.

“Qobustan” EŞ-dən “Azərenerji” ASC-nin Mətbuat xidmətinə daxil olan məlumata görə, təmir işləri sırasına “Nabur”, “Qurbançı”, “Sündü”, “Poladlı”, “Təklə”, “Şıxzərli”, “Ərəbqədim”, “Şəhər 1 -2” EVX və 10 kV-lik “Qaracüzlü” budaqlanması daxildir.  Mənbənin bildirdiyinə görə, burada dayanıqlığın daha da artırılması üçün bir sıra müxtəlif təyinatlı təmir və yenidənqurma işləri görülüb. Bu tədbirlərə,  naqillərin əvəz edilməsi, izolyatorların quraşdırılması, dayaqların dəyişdirilməsi və yaxud təmir ediməsi aiddir. Belə ki, hesabat dövründə 3,4 kilometrə yaxın naqil və 10 dayaq yenisi ilə əvəzlənmiş, 210 metrdən artıq kabel xətti təmir edilmiş, 600 metrə yaxın SİP kabel xətti çəkilmişdir.

Qeyd edək ki, sözügedən dövrdə Cəyirli ərazisində bir KTM quraşdırılmış, “Ərəbqədim” və “Təklə Mirzəbaba” HX-lərindən doydurulan müxtəlif gücdə hər birində bir ədəd olmaqla iki transformator yenisi ilə əvəzlənmişdir. Eyni zamanda 10-a yaxın transformator və komplekt transformator məntəqəlirində müxtəlif təyinatlı təmir işləri həyata keçirilmişdir. Bunlardan əlavə beş transformator da təmir edilərək istehlakçıların istifadəsinə verilmişdir.

Onu da qeyd edək ki, təmir-bərpa işləri mütəmadi olaraq yerinə yetirilir və istehlakçılar  enerji təchizatı sarıdan heç bir problemlə üzləşmir. Müəssisədən bildirildiyi kimi, enerji daşıyıcıların yüksək səviyyədə fəaliyyətini təmin etmək məqsədilə atılan addımlar ənənəvi olaraq davam etdirilir.

“Əməkdaşlarımız həmişə olduğu kimi, bundan sonra da  istehlakçılara göstərilən  xidmətin keyfiyyətinin daha da yüksəldilməsi, texnoloji itkilərin müəyyən olunmuş həddə saxlanması, kommersiya itkilərinin qarşısının alınması istiqamətində tədbirləri davam etdirəcəklər”, – deyən mənbə onu da bildirdi ki, cari ilin may ayında müəssisənin xidməti ərazilərində istehlakçıların elektrik enerjisindən istifadə qaydalarına riayət etməsi ilə bağlı keçirilmiş reydlər zamanı 17 qayda pozuntusu faktı  aşkar edilmişdir ki, bunun da 16-sı məişət abonenti (əhali) istehlakçı qrupuna aiddir.  Aşkar edilmiş pozuntular müvafiq qaydada aktlaşdırılaraq 54,6 min kilovatsaatdan artıq (bunun da 51,5 min kilovatsaatdan çoxu məişət abonenti (əhali) istehlakçı qrupuna aiddir) itirilmiş elektrik enerjisinin 3,3 min manata yaxın istehlak dəyəri bərpa edilmişdir.

Yeri gəlmişkən, cari ilin 5 ayı ərzində keçirilmiş reydlər zamanı 65 istehlakçının (bunun 47-si məişət abonenti (əhali) istehlakçı qrupuna aiddir) sayğac uçot komplektində pozuntu aşkar edilərək 93 min kilovatsaata yaxın (bunun 75,5 min kilovatsaata yaxını məişət abonenti (əhali) istehlakçı qrupuna aiddir) itirilmiş elektrik enerjisinin 5,6 min manata yaxın istehlak dəyəri bərpa edilmişdir. Hesabat dövründə bərpa edilmiş istehlak dəyərinin 65 faizə yaxın hissəsinin ödənişi təmin edilmişdir. Qalıq hissənin ödənilməsi istiqamətində müvafiq tədbirlər görülür. Mənbədən qayda pozuntularının təsnifatı barədə əldə etdiyimiz məlumata istinadən onu da bildirək ki,  elektrik enerjisindən yenə də kənar xətt vasitəsilə istifadə edilməsi halı üstünlük təşkil etmişdir.

Mənbə onu da bildirdi ki, may ayında müəssisə üzrə 1,5 milyon kilovatsaata yaxın elektrik enerjisi istehlak edilmişdir ki, bu da ötən ilin müvafiq dövrü ilə müqayisədə 192 min kilovatsaat çoxdur.  İstehlak edilmiş elektrik enerjisinin dəyərinin ödənişi isə ötən ilin müvafiq dövründəki göstəricidən mütləq 11 faizdən çoxdur. O cümlədən, daimi əhali istehlakçı qrupunda isə istehlak ötən ilin eyni dövrü ilə müqayisədə 77,4 min kilovatsaat artaraq 1,1 milyon kilovatsaata yaxın olmuşdur. Ödənişdə mütləq artım isə 1,3 faiz təşkil etmişdir.

Onu da qeyd etmək yerinə düşərdi ki, cari ilin 5 ayı ərzində ümumi istehlak ötən ilin müvafiq dövrü ilə müqayisədə 1,2 milyon kilovatsaata yaxın artaraq 8 milyon kilovatsaatdan çox olmuşdur. Ötən ilin müvafiq dövrünə nisbətən ümumi ödəniş mütləq 7 faizə yaxın artıb. O cümlədən, daimi əhali istehlakçı qrupunda isə istehlak 5,7 milyon kilovatsaatdan artıq olmuşdur ki, bu da ötən ilin müvafiq dövrü ilə müqayisədə 728,5 min kilovatsaat çoxdur. Ödənişdə mütləq artım isə 7 faizə yaxındır.