Ölkənin elektrik enerjisi təsərrüfatlarında həyata keçirilən hazırlıq işləri Xızının elektrik enerjisi ilə təminatında müstəsna rolu olan enerji obyektlərindən də yan keçmədi. Digər enerji müəssisələri kimi, “Xızı Elektrik Şəbəkəsi”nin (EŞ) xidməti ərazisində əvvəllər olduğu kimi son aylar  ərzində də elektrik enerjisinə olan tələbatın tam və keyfiyyətli şəkildə paylanması, elektrik verilişi xətlərində texnoloji itkilərin azaldılması istiqamətində  müəssisənin balans mənsubiyyətindəki transformator məntəqələri (TM) və elektrik verilişi xətlərində mühüm tədbirlər icra edilməkdədir. Ümumiyyətlə, cari ildə, o cümlədən son üç ay ərzində müəssisənin balans mənsubiyyətinə aid olan EVX-lərində və TM-lərdə nəzərdə tutulmuş təmir işləri qrafikə uyğun başa çatdırılmışdır.

Müəssisədən “Azərenerji” ASC-nin Mətbuat xidmətinə daxil olan məlumata görə, cari ilin son üç ayı ərzində müəssisənin xidməti ərazisində 1,5 kilometrdən artıq SİP kabel xətti çəkilmişdir. Eyni zamanda əyilmiş dayaqlar düzləndirilmiş, məftillər tarımlanmış və 0,4 kV-lik xətlərdə müxtəlif təyinatlı təmir işləri də həyata keçirilımişdir. Bütün bunlarla yanaşı dörd dayaq da yenisi ilə əvəzlənmişdir. Qeyd edək ki, sözügedən dövrdə müəssisənin balans mənsubiyyətinə aid olan 16 TM-də müxtəlif təyinatlı təmir işləri aparılmışdır. Eyni zamanda Giləzi qəsəbəsində 160 kVA-lıq və Təzəkənd kəndində isə 63 kVA-lıq transformatorlar dəyişdirilmişdir.

Mənbədən əldə etdiyimiz digər bir məlumata görə, şəbəkə üzrə yanğından mühafizə tədbirləri də daim diqqət mərkəzindədir. Hazırki hava şəraitini nəzərə alaraq  və yanğın təhlükəsizliyinin təmin edilməsi məqsədilə TM-lərin ərazisi quru otlardan təmizlənmiş və digər qabaqlayıcı tədbirlər görülməkdədir. “Növbəti mövsümə hazırlığın uğurla başa çatdırılması istiqamətində enerji təchizatçıları öhdələrinə düşən vəzifələri layiqincə yerinə yetirməyə çalışırlar”, – deyən mənbə elektrik enerjisindən qeyri qanuni istifadə hallarının qarşısının alınması istiqamətində həyata keçirilən tədbirlər barədə də məlumat verdi.

Mənbəyə istinadən qeyd edək ki, cari ilin 5 ayı ərzində müəssisənin xidməti ərazisində keçirilmiş reydlər zamanı 182 istehlakçının (bunun 180-ə yaxını məişət abonenti (əhali) istehlakçıları qrupuna aiddir) sayğaç uçot komplektini pozması faktı aşkar edilmişdir. Aşkar edilmiş qayda pozuntuları müvafiq qaydada aktlaşdırılmış və 871,2 min  kilovatsaata yaxın (bunun 847,4 min kilovatsaatdan çoxu məişət abonenti (əhali) istehlakçıları qrupuna aiddir) itirilmiş elektrik enerjisinin 52,3 min manata yaxın istehlak dəyəri bərpa edilmişdir. Həyata keçirilən müvafiq tədbirlər nəticəsində həmin bu məbləğin 50 faizə yaxın hissəsinin ödənişi təmin edilmiş və qalan hissənin ödənilməsi istiqamətində isə müvafiq tədbirlər həyata keçirilir.

“Həyata keçirilmiş məqsədyönlü tədbirlər nəticəsində istehlakçıların elektrik enerjisi ilə təminatında  dayanıqlıq və keyfiyyət daha da yüksəlmişdir”, – deyən mənbə onu da bildirdi ki, cari ilin may ayında müəssisə üzrə 6,9 milyon kilovatsaata yaxın elektrik enerjisi istehlak edilmişdir ki, bu da ötən ilin müvafiq dövrü ilə müqayisədə 413 min kilovatsaat çoxdur. O cümlədən, daimi əhali istehlakçı qrupunda isə istehlak ötən ilin müvafiq dövrü ilə müqayisədə 182 min kilovatsaatdan çox artaraq 513 min kilovatsaata yaxın olmuşdur. Ötən ilin müvafiq dövrü ilə müqayisədə enerji haqqının ödənişində mütləq artım isə 2 faizə yaxın olmuşdur.

Onu da qeyd edək ki, cari ilin 5 ayı ərzində müəssisə üşrə ümumi istehlak 35,4 milyon kilovatsaata yaxın olmuşdur. Nəticədə ötən ilin müvafiq dövrü ilə müqayisədə istehlak 4,3 milyon kilovatsaatdan, ödəniş isə mütləq 19 faizdən  çox artmışdır. O cümlədən, daimi əhali istehlakçı qrupunda isə bu göstəricilər müvafiq olaraq 3,7 milyon kilovatsaatdan artıq, 817 min kilovatsaata və 8 faizə yaxın olmuşdur.