Digər elektrik stansiyalarında olduğu kimi, “Bakı” elektrik stansiyasında da aqreqatlarda qrafikə əsasən növbəti istismar həddinə uyğun təmir işləri aparılır. Hal-hazırda aqreqatlar dispetçer qrafikinə uyğun olaraq fəaliyyət göstərir. Stansiya işə başladığı gündən  qrafikə uyğun olaraq normal iş şəraitində fəaliyyət göstərir və bu günə kimi (01.06.2013-cü ilə kimi) 3 milyard 464,1 milyon kilovatsaatdan artıq elektrik enerjisi istehsal edilmişdir.

Elektrik stansiyasından  “Azərenerji” ASC-nin Mətbuat xidmətinə daxil olan məlumata görə, stansiyada cari ilin may ayında 42,5 milyon kilovatsaata yaxın elektrik enerjisi istehsal edilmişdir.  Qeyd edək ki, 2013-cü ilin 5 ayı ərzində isə burada 235,6 milyon kilovatsaata yaxın elektrik enerjisi istehsal edilmişdir.

Onu da qeyd edək ki, avadanlıqların iş səmərəliliyinin artırılması, enerjinin ötürülməsi və paylaşdırılması sistemlərinin dayanıqlı, sabit işləməsinin və istismar səviyyəsinin  yüksəldilməsi istiqamətində həyata keçirilmiş məqsədyönlü tədbirlər nəticəsində cari ilin 5 ayında stansiyanın digər texniki iqtisadi göstəricilərində də qənaətbaxş nəticələr əldə olunmuşdur.

Mənbədən əldə etdiyimiz digər bir məlumatda o da bildirilir ki, stansiyada aqreqatların hamısı saz vəziyyətdədir. İstismar səviyyəsinin yüksək həddə saxlanılmasını təmin etmək üçün texniki məsələlərə diqqətlə yanaşılır, vaxtlı-vaxtında texniki baxışlar keçirilir və zəruri operativ tədbirlər görülür. Təmir işləri də stansiyanın təmir briqadası tərəfindən aparılır.

Onu da qeyd etmək yerinə düşərdi ki, cari ilin son üç ayında maşın sexində həyata keçirilmiş təmir kampaniyası zamanı avadanlıqlar təftiş edilmiş, istismar prosesində ortaya çıxan nasazlıqlar aradan qaldırılmış, avadanlıqlarda sıradan çıxmış hissələr yeniləri ilə əvəz edilmişdir. Görülən işlərə nümunə kimi yağ süzgəclərinin dəyişdirilməsi, hava soyuducularının, karterlərin təmizlənməsi, yağ əlavə edilməsi və digər işləri göstərmək olar. Yeri gəlmişkən, sözügedən dövrdə bütün generatorlarda cari təmir işləri aparılmışdır.

Mənbəyə istinadən onu da qeyd edək ki, payız-qış mövsümünə hazırlıq tədbirlərinə uyğun olaraq elektrik sexində də avadanlıqlara texniki baxış keçirilmiş və müxtəlif təyinatlı təmir işləri görülmüşdür. O cümlədən, güc transformatorlarında, eleqaz açarlarında, ayrıcılarda texniki xidmət işləri aparılmışdır. Bütün bunlarla yanaşı generatorun yağ nasosları təftiş və təmir edilimiş, səthləri təmizlənmişdir.

Digər enerji obyektlərində olduğu kimi, burada da yanğın təhlükəsizliyi məsələsi daima diqqət mərkəzində saxlanılır. Sexlər, inzibati bina və yardımçı binalar yanğınsöndürmə avadanlıqları ilə təmin olunmuş, ərazi quru otlardan və yanğın törədə biləcək tullantılardan təmizlənmiş, abadlıq işləri görülmüşdür. Sonda onu da qeyd edək ki, müəssisədə çalışan işçilərin peşəkarlıq qabiliyyətlərinin artırılması məsələsi də diqqət mərkəzində saxlanılır.

Xatırladaq ki, bu elektrik stansiyası 12 aqreqatdan ibarətdir və ümumi gücü  105 MVt-dır.