“Cəlilabad Elektrik Şəbəkəsi” üzrə keçən ilin dörd ayı ilə cari ilin analoji dövrünü müqayisə etsək, görərik ki, həm istehlak olunan elektrik enerjisinin dəyərinin ödənilməsində, həm də istehlaka ötürülən elektrik enerjisinin dayanıqlığının təmin olunmasında ciddi irəliləyişlər baş verib. Belə ki, həmin dövrdə ümumi ödənişdə 12 faiz, daimi əhali qrupu üzrə ödənişdə isə 13,4 faiz mütləq artım müşahidə olunub. Bütün bunlar istismarın yaxşılaşdırılması istiqamətində aparılan ardıcıl tədbirlər nəticəsində mümkün olub.

Şəbəkədən “Azərenerji” ASC-nin Mətbuat xidmətinə daxil olan məlumata görə,  əsasən, vətəndaşların həyətlərindən keçən 0,4 kilovoltluq açıq naqillərin SİP-kabellə dəyişdirilməsi, müasir tələblərə cavab verən smart-kart tipli sayğacların quraşdırılması işə çox müsbət təsir göstərib. Məsələn, sərfiyyatın daha çox olduğu 1427 abonentin məskunlaşdığı Alar kəndində bu istiqamətdə həyata keçirilən tədbirlərin nəticəsində  elektrik enerjisi istehlakı xeyli azalıb. 2012-ci ilin dekabrına kimi təkcə bu kənd qış aylarında 1,2 milyon, yay aylarında isə təxminən 700-800 min kilovat-saat elektrik enerjisi götü­rürdü. Sayğaclaşma başa çatdıqdan sonra isə burada bu ilin aprel ayı üçün cəmi 178 min kVt-saat  elektrik enerjisinin istehlak olunduğu aşkarlanıb.

Qeyd edək ki, yenidənqurma tədbirlərinin növbəti mərhələdə Bakı-Astara magistral yolunun ətrafında yerləşən kənd və qəsəbələrdə reallaşdırılması nəzərdə tutulur. Təx­minən 600 abonentin olduğu Qarazəncir, 453 abonentin olduğu Maşlı-Muğan kəndləri və 2700 abonenti olan Göytəpə qəsəbəsinin şəbəkələri bu mərhələdə yeniləşdiriləcək. Yeri gəlmişkən, görülən işlər, aparılan maarifləndirmə tədbirləri elektrik enerjisindən qeyri-qanuni istifadə hallarının da azalmasına təsirini göstərib. Bu ilin  dörd ayı ərzində aşkarlanan belə    hallarla bağlı 250 akt tərtib olunub.

Mənbə onu da bildirdi ki, növbəti payız-qış mövsümünə hazırlıq tədbirləri də qrafikə uyğun olaraq aparılır. Qarşıda duran işlərə nümunə olaraq əsasən həyətlərdən keçən açıq naqillərin SİP kabellə əvəzlənməsi göstərilə bilər. Artıq 35/10 kilovoltluq “Cəlilabad” yarımstansiyasından qidalanan 6 saylı və 2 saylı “Göytəpə” hava xəttində müvafiq işlər icra olunub. Hazırda 110/35/10 kV-lik “Uzuntəpə” yarımstansiyasından çıxan 10 kV-lik xətdə dayaqlar basdırılır və yaxın zamanlarda SİP kabellərin çəkilməsi gözlənilir.

Sonda onu da qeyd edək ki, bütün enerjisistemdə olduğu kimi, bu energetika təsərrüfatında da texniki itkilərin qarşısının alınmasına xüsusi diqqət yetirildiyini deyən mənbə məlumat verdi ki, bu məqsədlə itki hallarının daha çox müşahidə edildiyi ərazilərdə xətlərin dəyişdirilərək yenisi ilə əvəzlənməsi işləri icra olunur. İlin əvvəlindən bu məqsədlə təxminən 1,5 km xətt daha keyfiyyətlisi ilə əvəz olunub və prosesin davamlı xarakter alması nəzərdə tutulur.