Ölkəmizin enerji sistemində həyata keçirilən məqsədyönlü tədbirlər, yeni texnologiyaların tətbiqi ilə aparılan quruculuq işləri  istehlakçıların dayanıqlı  və keyfiyyətli elektrik enerjisi ilə təminatını daha da yaxşılaşdırmağa imkan verir. Texniki-iqtisadi göstəricilərin səviyyəsinin yüksəldilməsini, o cümlədən  elektrik enerjisinin dayanıqlı ötürülməsini təmin etmək üçün nəzərdə tutulan texniki tədbirlər cari ildə də davam etdirilmişdir.

“Şabran Elektrik Şəbəkəsi”ndən (EŞ) “Azərenerji” ASC-nin Mətbuat xidmətinə daxil olan məlumata görə, son üç ay ərzində 10-0,4 kV-lik paylayıcı şəbəkələrdə bir sıra əhəmiyyətli yenidənqurma və təmir işləri aparılıb.

Qeyd edək ki,  10 kV-lik I “Şəhər”, “Qorğan”, “Gəndab”, “Düzbilici” və digər bir neçə hava elektrik verilişi xətlərində aparılan təmir işləri zamanı 2 km-ə yaxın naqil yenisi ilə əvəz edilmiş, kabel xətti çəkilmiş, 7 dayaq quraşdırılmış, 2,3 km məsafədə sallaq naqillər dartılmış, 14 dayaq düzləndirilmişdir. Müvafiq təmir-bərpa işləri Şabran şəhəri, Dəvəçi, Sincənboyad, Pirəmsən və digər bir neçə kəndlərin 0,4 kV-lik elektrik verilişi xətlərində də yerinə yetirilmiş, enerji daşıyıcılar normal iş rejiminə gətirilmişdir. O cümlədən, 2 km-ə yaxın naqil yenilənmiş, bir neçə dayaq yenisi ilə əvəzlənmiş, 6-sı isə təmir edilmişdir. Bundan əlavə, EŞ üzrə 30-dan artıq TM-də müxtəlif təyinatlı təmir işləri aparılmış, bir yeni KTM quraşdırılaraq istismara verilmişdir. Mənbədən onu da bildirdilər ki, texnoloji itkilərin azaldılması məqsədilə 250 kVA-lıq transformator yükə uyğun yenisi ilə (400 KVA) əvəzlənmişdir.

Mənbə onu da bildirdi ki, cari ilin aprel ayında müəssisə üzrə 5 milyon kilovatsaata yaxın elektrik enerjisi istehlak edilmişdir. Bu da ötən ilin müvafiq dövrü ilə müqayisədə 481 min kilovatsaat çoxdur. İstehlak edilmiş elektrik enerjisinin dəyərinin ödənişi isə ötən ilin eyni dövründəki göstərici ilə müqayisədə mütləq 25 faizdən çox artmışdır. O cümlədən, daimi əhali istehlakçı qrupunda istehlak ötən ilin müvafiq dövrü ilə müqayisədə 505 min kilovatsaat azalaraq 1,7 milyon kilovatsaata yaxın, ödənişdə  mütləq artım isə 9 faizdən çox olmuşdur.

Onu da qeyd edək ki, cari ilin 4 ayı ərzində müəssisə üzrə istehlak ötən ilin müvafiq dövrü ilə müqayisədə 314 min kilovatsaat azalaraq 21,8 milyon kilovatsaata yaxın olmuşdur. Ödəniş isə ötən ilin müvafiq dövrü ilə müqayisədə mütləq 11 faizə yaxın artmışdır. O cümlədən, daimi əhali istehlakçıları tərəfindən 9,3 milyon kilovatsaatdan artıq elektrik enerjisi istehlak edilmişdir. Nəticədə ötən ilin müvafiq dövrü ilə müqayisədə istehlak 201 min kilovatsaat, ödəniş isə mütləq 12 faizdən çox artmışdır.

Mənbədən əldə etdiyimiz digər bir məlumata görə, cari ilin aprel ayında müəssisə üzrə 60  qayda pozuntusu aşkar edilərək 159 min kilovatsaatdan artıq itirilmiş elektrik enerjisinin 9,5 min manatdan çox istehlak dəyəri bərpa edilmişdir.

Onu da qeyd etmək yerinə düşərdi ki, cari ilin 4 ayı ərzində istehlakçıların elektrik enerjisindən istifadə qaydalarına riayət etmələrinin yoxlanılması ilə bağlı keçirilmiş reydlər zamanı 445-dən artıq istehlakçının sayğac uçot komplektində qüsur aşkar edilərək 1 milyon 204,1min kilovatsaata yaxın itirilmiş elektrik enerjisinin 72,2 min manatdan artıq istehlak dəyəri bərpa edilmişdir. Həyata keçirilən müvafiq tədbirlər nəticəsində həmin bu məbləğin  müəyyən hissəsinin ödənişi təmin edilmiş və qalan hissənin ödənilməsi istiqamətində isə müvafiq tədbirlər həyata keçirilir.

Yeri gəlmişkən, Şabran rayonunun paylayıcı şəbəkələrinin enerji təchizatı 10, 6 və 0,4 kV-lik 725 kilometrdən artıq uzunluqda EVX-lər və ümumi gücü 70,3 MVA-dan artıq olan 370 ədəd transformator vasitəsilə təmin olunur.