“Neftçala Elektrik Şəbəkəsi”nin xidməti ərazisində istismar vəziyyətinin daha da yaxşılaşdırılması, istehlak olunan ener­jinin dəyərinin ödənilməsi istiqamətində aparılan işlər müntəzəm xarakter daşıyır. Şəbəkədən “Azərenerji” ASC-nin Mətbuat xidmətinə daxil olan məlumata görə balansda olan 110/35/6 kilovoltluq “Neftçala” yarımstansiyasında  təmir işləri aparılıb. Təmir çərçivəsində mühafizə yoxlanılıb, yağın sınağı aparılıb, qüsur halları aşkarlanan çıxış xətlərində isə bərpa işləri yerinə yetirilib. Təsərrüfata daxil olan digər ərazilərdə də zəruri tədbirlərin icrası davam etdirilir.

Şəbəkədən aldığımız məlumata görə qarşıdan gələn payız-qış mövsümünə hazırlıq tədbirləri də sistemli şəkildə yerinə yetirilir. Birinci növbədə yüksək gərginlikli xətlərin qüsurlu hissələrində bərpa işləri görülür, izolyatorlar daha keyfiyyətliləri ilə əvəzlənir. TM-lərdə transformatorların sınağı aparılır, qüsurlar aradan qaldırılır. Eyni zamanda itki hallarının azaldılması üçün həyətlərdən keçən 0,4 kilovoltluq xətlər və dayaqlar kənara çıxarılıb. Hazırkı vəziyyətdə də bu hal davam etdirilir.

Qeyd edək ki, şəbəkə üzrə ümumilikdə 17 ədəd 35/10 kilovoltluq, 2 ədəd 110 kilovoltluq yarımstansiya və 560-dan artıq TM fəaliyyət göstərir. Istifadəçilərin fasiləsiz elektrik təminatının daha da yaxşılaşdırılması məqsədlilə yerinə yetirilən tədbirlər sırasına müxtəlif güclü transformatorlara texniki baxışların keçirilməsi və onların lazımi səviyyədə təmir edilməsi də daxildir. Bu obyektlərin normal fəaliyyətlərinin təmin olunması üçün bütün zəruri tədbirlər lazım olan şəkildə yerinə yetirilir, dayanıqlığın təminatına xidmət edən işlər görülür.

Onu da qeyd etmək yerinə düşərdi ki, tələbatçıların fasiləsiz elektrik enerjisi ilə təmin olunmasında elektrik verilişi xətlərinin saz vəziyyətdə olması da mühüm rol oynayır.  Bu məqsədlə 110 kilovoltluq I - II “Neft­çala” xətlərində zəruri tədbirlərin aparılmasına başlanıb. İlk mərhələdə izolyatorlar yenisi ilə əvəzlənir. Bunun ardınca xətlərin və zərurət yaranan yerlərdə dayaq­ların dəyişdirilməsi planlaşdırılır.

Digər şəbəkələrdəki kimi elektrik enerjisindən qeyri-qanuni istifadə halları bu xidmət müəssisəsində də müşahidə olunmaqdadır. İlin əvvəlindən bu qəbildən olan abonentlərlə bağlı  246 ədəd akt tərtib edilib və təxminən 860 min kilovat-saat itirilmiş elektrik enerjisinin istehlak dəyərinin bərpasına nail olunub. Pozuntunun xarakteri araşdırılarkən məlum olub ki, proses sayğacdankənar xətlərin çəkilməsi yolu ilə aparılır.

Mənbə onu da bildirdi ki, şəbəkənin yenidən qurulması istiqamətində görülən tədbirlərin reallaşdırılması da davam etdirilir. “Mayak-1” xəttindən qidalanan və 278 abonenti olan Mayak kəndinin 0,4 kilovoltluq xətləri yenidən qurulur. Bundan başqa Bankə qəsəbəsində, Aşağı Qaramanlı kəndində, şəhərin Rəsulzadə küçəsində kabelləşmə tədbirləri görüləcək. Nəticə etibarı ilə həm enerji itkilərinin qarşısının alınmasına, həm də debitor borcların ödənilməsinə nail olunacaq.