İstehlakçıların daha da keyfiyyətli və dayanıqlı elektrik enerjisi ilə təmin olunması, gələcəkdə yarana biləcək problemlərin qarşısının alınması məqsədilə həyata keçirilən yenidənqurma işləri çərçivəsində respublikanın qərb bölgəsinin enerji təchizatının yaxşılaşdırılmasına da xüsusi diqqət yetirilməkdədir.

“Azərenerji” ASC-nin Mətbuat xidmətinə daxil olan məlumata görə, son üç ay ərzində 110 kV-lik "Gəncə-1" yarımstansiyasında sözügedən gərginlikdə 3 dəst yağ açarı müasir tipli eleqaz açarları ilə dəyişdirilib və eyni sayda cərəyan transformatoru quraşdırılıb. Eyni zamanda II Sistem şində gərginlik tranformatoru yeni tiplisi ilə əvəzlənmişdir. Bütün bunlarla yanaşı bu yarımstansiyada 1, 2 və 3 saylı transformatorların soyutma sistemlərində də müxtəlif təyinatlı təmir işləri həyata keçirilmiş və işıqlandırma sistemi yenidən qurulmuşdur.

Yeri gəlmişkən, sözügedən dövrdə müəssisənin balans mənsubiyyətinə aid olan bir neçə yarımstansiyada mühüm işlər görülüb. Daha doğrusu 110 kV-lik “Maşınqayırma”, “Şəmkir SES tikintisi”, 35 kV-lik “Slavyanka” yarımstansiyalarında yeni və daha güclü transformatorların quraşdırılması ilə yenidənqurma işləri həyata keçirilmişdir.

Qeyd edək ki, 110 kV-lik “YPK” yarımstansiyasında transformatorun dəyişdirilməsi və “Şampanzavod” yarımstansiyasında eleqaz açarların quraşdırılması da görülən işlər sırasındadır.

Mənbə onu da bildirdi ki, EVX-lər üzrə əsaslı və cari təmir işləri davam etdirilir. Son üç ay ərzində müəssisənin xidməti ərazisində bir ədəd 35 kV-lik dayaq dəyişdirilmiş, 110 kV-lik xətlərdə də müxtəlif təyinatlı təmir işləri həyata keçirilmişdir.

Yenidənqurma işləri çərçivəsində həyata keçirilən infrastruktur layihələri haqqında əldə etdiyimiz məlumatda bildirilir ki, Daşkəsən rayonunda yeni tikilən 35 kV-lik “Alunit” yarımstansiyasında işlər qrafikə uyğun aparılır. Eyni gərginlikli “Gəncəçay” hava xəttinin yeraltı kabel xəttinə keçirilməsi işləri isə davam etdirilir.