Şəbəkələrdə elektrik enerjisinin istehlak dəyərinin ödənişinin tam təmin olunması  istiqamətində tədbirlər həyata keçirilməklə yanaşı, istismarın səviyyəsinin yüksəldilməsinə xüsusi diqqət yetirilir.

Bu baxımdan, 30,400-dən çox abonentə (bunun təxminən 29 mini məişət abonenti (əhali) istehlakçı qrupuna aiddir) xidmət göstərən “Salyan Elektrik Şəbəkəsi”nin kollektivi də məqsəd­yönlü iş aparır. Əvvəlcədən hər ay üçün görüləsi işlərin qrafiki müəyyənləşdirilir və bunun da əsasında qarşıya qoyulan vəzifələr icra olunur.

Şəbəkədən “Azərenerji” ASC-nin Mətbuat xidmətinə daxil olan məlumatda bildirilir ki, ilin əvvəlindən kənd ərazilərində 9 km uzunluğunda xətt və xeyli sayda dayaq  yenisi ilə əvəz olunub. Bundan başqa, şəhərin “20 Yanvar” adlanan hissəsində 2 kilometr uzunluğunda SİP kabel çəkilib. Bu proses əsasən xətlərə müdaxilə imkanlarının daha çox olduğu ərazilərdə aparılıb.

Qeyd edək ki,  4 ay ərzində ümumi şəbəkə üzrə itirilmiş elektrik enerjisinin istehlak dəyərinin bərpası məqsədilə 594 akt tərtib edilib. 5 milyon 359 min kilovat-saatdan çox itirilmiş elektrik enerjisinin istehlak dəyərinin bərpasına nail olunub. Onun ödənilməsi istiqamətində zəruri tədbirlərin görülməsi davam etdirilir. Həmçinin müəssisə üzrə debitor borclarının ödənilməsi istiqamətində də zəruri tədbirlər görülür. Borclarını ödəməkdən imtina edən 12 abonent haqqında qanunvericiliyə uyğun olaraq  lazımi tədbirlər həyata keçirilir.

Mənbə onu da bildirdi ki, hazırda şəbəkədə istismarla bağlı məsələlərin normal şəkildə həll olunması üçün bütün imkanlar mövcuddur. Lazım olan mal-materialla təminat məsələsi lazımi səviyyədə həllini tapır. Hazırda əsas diqqət 10 kilovoltluq və ondan aşağı gərginlikdə olan xətlərin yeniləşdirilməsinə yönəldilib.

Yeri gəlmişkən, şəbəkədə istehlak olunan elektrik enerjisinin ödənişinin tam təmin edilməsi, neqativ halların aradan qaldırılması  məqsədilə maarifləndirmə tədbirlərinə də üstünlük verilir. Şəbəkədə müasir texnologiyaların tətbiqi genişləndirildikcə arzuolunmaz hallar da tədricən aradan qalxmış olacaq.