Bu il qışın sərt keçməsi hazırlıq səviyyəsinin vəziyyətinə bir daha aydınlıq gətirdi. Belə ki, rayonun elektrik şəbəkəsi kollektivinin birgə səyi nəticəsində görülən tədbirlər nəticəsi olaraq ciddi açılma halları müşahidə olunmadı.

“Zaqatala Elektrik Şəbəkəsi”ndən “Azərenerji” ASC-nin Mətbuat xidmətinə daxil olan məlumata görə, son üç ay ərzində müəssisənin balans mənsubiyyətinə aid olan 10 kV-lik “Tala”, “S. Vurğun”, “Mosul”, “Lahıc” və digər bir neçə EVX-də həyata keçirilmiş müxtəlif təyinatlı təmir işləri zamanı xətlərin 2 km-ə yaxın hissəsi təmirdən çıxarılıb. Paralel olaraq Zaqatala şəhəri, rayonun Muxax, Car, Əli Bayramlı və Y. Tala kəndlərində 0,4 kV-lik xətlərin 3,7 km-dən artıq hissəsi təmir olmuşdur. Qeyd edək ki, sözügedən dövrdə təmir işləri müəssisənin xidməti ərazisində olan TM-lərdən də yan ötməmiş və burada 30-a yaxın TM-də müxtəlif təyinatlı təmir işləri həyata keçirilmişdir.

“Həyata keçirilmiş məqsədyönlü tədbirlər nəticəsində istehlakçıların elektrik enerjisi ilə təminatında  dayanıqlıq və keyfiyyət daha da yüksəlmişdir”, – deyən mənbə onu da bildirdi ki, cari ilin aprel ayında müəssisə üzrə 6 milyon kilovatsaata yaxın elektrik enerjisi istehlak edilmişdir ki, bu da ötən ilin müvafiq dövrü ilə müqayisədə 583 min kilovatsaata yaxın çoxdur. Ödəniş isə ötən ilin müvafiq dövrü ilə müqayisədə 20 faizdən çox mütləq artmışdır.   O cümlədən, daimi əhali istehlakçı qrupunda isə istehlak ötən ilin müvafiq dövrü ilə müqayisədə 156 min kilovatsaata yaxın artaraq 3,8 milyon kilovatsaata yaxın olmuşdur. Ötən ilin müvafiq dövrü ilə müqayisədə enerji haqqının ödənişində mütləq artım 20 faizə yaxın olmuşdur.

Onu da qeyd edək ki, cari ilin 4 ayı ərzində müəssisə üzrə ümumi istehlak 26,3 milyon kilovatsaatdan artıq olmuşdur. Nəticədə ötən ilin müvafiq dövrü ilə müqayisədə istehlak 2,8 milyon kilovatsaatdan, ödəniş isə mütləq 15 faizdən  çox artmışdır. O cümlədən, daimi əhali istehlakçı qrupunda isə bu göstəricilər müvafiq olaraq 16,5 milyon kilovatsaata, 962 min kilovatsaata və 11 faizə yaxın olmuşdur.

Yeri gəlmişkən, uçot sisteminin təşkili də şəbəkə qarşısında dayanan mühüm vəzifələrdəndir. Artıq bu istiqamətdə olan tədbirlər əsasən yerinə yetirilib. Bununla belə, istismar zamanı qüsurlu olması aşkarlanan, yaxud sıradan çıxmış sayğacların da yeniləri ilə əvəz olunması istiqamətində zəruri tədbirlər həyata keçirilir.

Mənbəyə istinadən onu da qeyd edək ki, cari ilin aprel ayında müəssisənin xidməti ərazisində keçirilmiş reydlər zamanı 20 istehlakçının sayğac uçot komplektində pozuntu faktı aşkar edilmişdir. Aşkar edilmiş qayda pozuntuları müvafiq qaydada aktlaşdırılmış, 53,5 min  kilovatsaata yaxın  itirilmiş elektrik enerjisinin 3.2 min manatdan artıq istehlak dəyəri bərpa edilmişdir.

Cari ilin 4 ayı ərzində sözügedən qayda pozuntusuna görə müəssisənin xidməti ərazisində 120-dən artıq akt tərtib olunmuş, 249,4 min kilovatsaatdan artıq itirilmiş elektrik enerjisinin 15 min manata yaxın istehlak dəyəri bərpa edilmişdir. Həyata keçirilən müvafiq tədbirlər nəticəsində həmin bu məbləğin 90 faizə yaxın hissəsinin ödənişi təmin edilmiş və qalan hissənin ödənilməsi istiqamətində isə müvafiq tədbirlər həyata keçirilir.

Sonda onu da qeyd edək ki, istismar işləri zamanı əməyin mühafizəsi və texniki təhlükəsizlik tədbirlərinin yerinə yetirilməsi də diqqətdə saxlanılır. Elə bu səbəbdən də şəbəkə üzrə istehsalat zədələnmələri və bədbəxt hadisələrin baş verməsi müşahidə olunmayıb.