Bütün enerji obyektlərində olduğu kimi “Şamaxı Elektrik Şəbəkəsi”nin (EŞ) xidməti ərazisində yerləşən bütün yarımstansiyalarda, transformator məntəqələrində, o cümlədən, komplekt transformator məntəqələrində və elektrikötürücü xətlərdə də dörd ay ərzində bir sıra təmir-bərpa işləri yerinə yetirilmişdir. EŞ-dən “Azərenerji” ASC-nin Mətbuat xidmətinə daxil olan məlumatda belə deyilir.

Qaynağın verdiyi məlumata görə, müəssisə üzrə 110 kV-lik “Şamaxı” yarımstansiyasından çıxan 10-kilovoltluq “Qonaqkənd”, “Mərkəz”, “Çörək zavodu”, I-II “Şəhər”, 35 kV-lik “Çuxuryurd” yarımstansiyasından çıxan 10 kV-lik “Məlhəm” və s. hava elektrik verilişi xətlərində (HEVX) ümumilikdə 8 kilometrə yaxın məsafədə əsaslı və cari təmir işləri aparılıb. Eyni zamanda 1,3 km-ə yaxın naqil SİP kabellə əvəzlənmiş, 60-a yaxın dayaq dəyişdirilmiş və beləliklə də istehlakçıların elektrik enerji təminatı daha da yaxşılışdırılmışdır.

Elektrik şəbəkəsi üzrə 10/0,4 kilovoltluq transformatroların təmiri də görülən işlərin tərkib hissəsini təşkil etmişdir.  Belə ki, sözügedən dövr ərzində burada müxtəlif gücdə 12 transformator məntəqəsində də müxtəlif təyinatlı təmir işləri həyata keçirilmiş, ümumi gücü 2,9 MVA olan 9 transformator da təmir edilərək istifadəyə verilmişdir. Bununla bərabər, yenidənqurma işləri zamanı 100 KVA transformator 160 KVA ilə əvəzlənmişdir. Müəssisədən bildirildiyinə görə, müntəzəm olaraq yerinə yetiriliən təmir-bərpa işləri enerji ötürücülərin iş qabiliyyətini artırır, enerji itkisinə yol açan amilləri  məhdudlaşdırır.

Mənbədən əldə edilən digər məlumata görə, müəssisənin xidməti ərazisində cari ilin aprel ayında keçirilmiş reydlər zamanı 24 istehlakçının (bunun 19-u məişət abonenti (əhali) istehlakçılar qrupuna aiddir) sayğac uçot komplektində qüsur aşkar edilərək 116,9 min kilovatsaata yaxın (bunun 24,5 min kilovatsaatdan çoxu məişət abonenti (əhali) istehlakçılar qrupuna aiddir) itirilmiş elektrik enerjisinin 7 min manatdan çox istehlak dəyəri bərpa edilmişdir.

Mənbəyə istinadən onu da qeyd edək ki, cari ilin 4 ayı ərzində keçirilmiş reydlər zamanı 78 istehlakçının (bunun 64-ü məişət abonenti (əhali) istehlakçılar qrupuna aiddir) qayda pozması faktı aşkar edilərək 229,2 min kilovatsaata yaxın (bunun 106 min kilovatsaatdan çoxu məişət abonenti (əhali) istehlakçılar qrupuna aiddir) itirilmiş elektrik enerjisinin 13,8 min manata yaxın istehlak dəyəri bərpa edilmişdir. Həyata keçirilən müvafiq tədbirlər nəticəsində hesabat ayında həmin bu məbləğin 60 faizdən artıq hissəsinin ödənişi təmin edilmiş və qalan hissənin ödənilməsi istiqamətində isə müvafiq tədbirlər həyata keçirilir.

Müəssisə üzrə cari ildə istehlak edilmiş elektrik enerjisinin həcmi və enerji haqqlarının  ödənilməsi vəziyyəti ilə əlaqədar verilən məlumata əsasən bildirək ki, aprel ayında müəssisə üzrə 5 milyon kilovatsaata yaxın elektrik enerjisi istehlak edilmişdir ki, bu da ötən ilin müvafiq dövrü ilə müqayisədə 736 min kilovatsaat çoxdur.  İstehlak edilmiş elektrik enerjisinin dəyərinin ödənişi isə ötən ilin müvafiq dövründəki göstəricidən mütləq 4 faizə yaxın çoxdur. O cümlədən, daimi əhali istehlakçı qrupunda isə istehlak ötən ilin eyni dövrü ilə müqayisədə 526 min kilovatsaat artaraq 3 milyon kilovatsaata yaxın olmuşdur. Ödənişdə mütləq artım isə 8 faizə yaxın olmuşdur.

Onu da qeyd etmək yerinə düşərdi ki, cari ilin 4 ayı ərzində isə ümumi istehlak ötən ilin müvafiq dövrü ilə müqayisədə 738 min kilovatsaata yaxın artaraq 21,9 milyon kilovatsaata yaxın olmuşdur. Ötən ilin müvafiq dövrünə nisbətən ümumi ödəniş mütləq 5 faizə yaxın artırılmışdır. O cümlədən, daimi əhali istehlakçı qrupunda isə istehlak 12,8 milyon kilovatsaata yaxın olmuşdur ki, bu da ötən ilin müvafiq dövrü ilə müqayisədə 235 min kilovatsaata yaxın azdır. Ödənişdə isə mütləq artım 10 faizdən çox olmuşdur.