Enerjisistemdə yenidənqurma işləri yüksək sürətlə davam etdirilir. Yüksək gərginlikli elektrik şəbəkələrinin texniki inkişafında bu daha aydın müşahidə edilir. Enerjisistemin dayanıqlığının təmin edilməsi və tələbatçılara keyfiyyətli elektrik enerjisinin ötürülməsi üçün ən vacib hissə olan elektrik enerjisinin ötürülməsi sahəsində hazırda mühüm işlərin həyata keçirilməkdədir.

“Şəki Regional Elektrik Şəbəkəsi”ndən “Azərenerji” ASC-nin Mətbuat xidmətinə  daxil olan məlumata görə, müəssisənin balans mənsubiyyətinə aid olan 35 kilovoltluq və ondan yuxarı gərginlikli EVX-lərdə cari ilin son üç ayı ərzində həyata keçirilmiş müxtəlif təyinatlı təmir işləri zamanı naqillər təmir edilmiş və yenisi ilə əvəzlənmiş, izolyatorlar dəyişdirilmişdir. Buna misal olaraq 110 kV-lik II-III “Şəki”, “İsmayıllı”, “Qəbələ”, “Əlibəyli”, 35 kV-lik “Çeşməli”, “Muxax”, “Basqal” və digər bir neçə hava xətlərində (HX) görülmüş işləri göstərmək olar. Bütün bunlarla yanaşı 35 kV-lik “Oğuz”, “Taxılçılıq”, “A.Göynək” HX-lərində dayaqların yenisi ilə əvəzlənməsi işləri də həyata keçirilmişdir.

Qeyd edək ki, sözügedən dövrdə texniki göstəricilərin daha da yaxşılaşdırılması məqsədilə müəssisənin balans mənsubiyyətinə aid olan 110 kV-lik “Şəki”, “İpək Kombinatı”, 35 kV-lik “Çeşməli”, “Girdimançay”, “K. Zəyid”, “Qax” və digər yarımstansiyalarda və onların yardımçı avadanlıqlarında əsaslı və cari təmir işləri yerinə yetirilmişdir. Təmir-bərpa işlərinə yağ açarlarının, ayrıcıların əsaslı təmiri, yarımstansiyanın torpaqlanma konturunun bərpası və digər işlər daxildir.

Mənbədən əldə etdiyimiz digər bir məlumata görə isə, müəssisənin balans mənsubiyyətinə aid olan 110 kV-lik “Əyriçay”, “Zaqatala”, “İsmayıllı”, 35 kV-lik “Oğuz”, “SAS” və digər sözügedən gərginliklərdə olan yarımstansiyalarda həyata keçirilmiş təmir işləri zamanı ümumi gücü 85 MVA-ya yaxın olan 10 transformator da təmir edilmişdir.

“Bunlardan əlavə, xətlərdə baş verən enerji itkisinin qarşısının alınması məqsədilə də müəyyən tədbirlər həyata keçirilmişdir”, – deyən mənbə yanğın təhlükəsizliyi tədbirləri barəsində də məlumat verdi və bildirdi ki, havaların istiləşməsi ilə əlaqədar olaraq yanğın təhlükəsizliyi tədbirləri daha da gücləndirilmişdir. Belə ki, EVX-lərin mühafizə zonaları və yarımstansiyaların əraziləri quru otlardan, yağ tutumlu avadanlıqların ətrafı çirkli yağ örtüyündən təmizlənmişdir. Eyni zamanda mühafizə avadanlıqlarının nəzarət və ölçü cihazları təftiş edilmiş və aşkar edilmiş qüsurlar aradan qaldırılmışdır.

Mənbədən daxil olan məlumata görə, fövqəladə hallar nəzərə alınmazsa, müəssisə avadanlıqları texniki göstəriciləri  baxımından  iqlim şəraitinə tam hazırdır.

Mənbədən cari ilin II rübündə nəzərdə tutulmuş təmir işləri ilə bağlı əldə etdiyimiz məlumata əsasən qeyd edək ki, 110 kV-lik “Şəki”, “Cəfərabad”, “Qəbələ”, “Laza”, 35 kV-lik “Çeşməli”, “Qoxmuq”, “Şorsu” və digər bir neşə yarımstansiya  və EVX-lərdə müxtəlif təyinatlə təmir işlərinin həyata keçirilməsi də nəzərdə tutulmuşdur.

Yeri gəlmişkən, icrası reallaşdırılan tədbirlər enerji ötürücülərində dayanıqlığın  yüksək səviyyədə təmin edilməsinə geniş imkanlar açır.