İstehlakçıların “Elektrik enerjisindən istifadə qaydaları”na riayət etmələrinin yoxlanılması istiqamətində reydlər digər Elektrik Şəbəkələrində (EŞ) olduğu kimi, “Qəbələ” elektrik şəbəksinin xidməti ərazisində də davam etdirilir.

Sözügedən müəssisədən “Azərenerji” ASC-nin Mətbuat xidmətinə daxil olan məlumata görə,  cari ilin aprel ayında müəssisənin xidməti ərazisində keçirilmiş reydlər zamanı 45 istehlakçının “Elektrik Enerjisindən İstifadə Qaydaları”nı pozması faktı aşkar edilmişdir. Aşkar edilmiş qayda pozuntuları müvafiq qaydada aktlaşdırılmış və 170,8 min  kilovatsaatdan artıq itirilmiş elektrik enerjisinin 10,2 min manatdan çox istehlak dəyəri bərpa edilmişdir.

Qeyd edək ki, cari ilin 4 ayı ərzində isə burada 320-yə yaxın qayda pozuntusu aşkar edilərək 1 milyon 239,2 min kilovatsaata yaxın itirilmiş elektrik enerjisinin 74,4 min manata yaxın istehlak dəyəri bərpa edilmişdi. Həyata keçirilən müvafiq tədbirlər nəticəsində həmin bu məbləğin 26 faizdən artıq hissəsinin ödənişi təmin edilmiş və qalan hissənin ödənilməsi istiqamətində isə müvafiq tədbirlər həyata keçirilir.

“Müvafiq təmir-bərpa işlər uğurla həyata keçirilmişdir”, – deyən mənbə onu da bildirdi ki, cari ilin son üç ayı ərzində təmir işləri “Qəbələ” və “Hacallı” yarımstansiyalarından çıxan 10 kV-lik hava elektrik verilişi xətlərində aparılmışdır. Qeyd edək ki, təmir-bərpa işləri ümumilikdə 9 kilometrə yaxın  məsafədə yerinə yetrilib.

Onu da bildirək ki, rayonun Bum qəsəbəsində, Böyük Pirəli, Bayramkoxa, Tikanlı və s. kəndlərində və Qəbələ şəhəri ərazisində 0,4 kVlik EVX-lər boyu təxminən 4,2 kilometr məsafədə əsaslı və cari təmir işləri görülüb.  Bütün bunlarla yanaşı sözügedən dövrdə 10 TM-də də müxtəlif təyinatlı təmir işləri həyata keçirilmişdir.

Mənbə onu da bildirdi ki, aprel ayında müəssisə üzrə 6,5 milyon kilovatsaatdan artıq elektrik enerjisi istehlak edilmişdir ki, bu da ötən ilin müvafiq dövrü ilə müqayisədə 926 min kilovatsaat çoxdur.  İstehlak edilmiş elektrik enerjisinin dəyərinin ödənişi isə ötən ilin müvafiq dövründəki göstəricidən mütləq 15 faizdən çoxdur. O cümlədən, daimi əhali istehlakçı qrupunda isə istehlak ötən ilin eyni dövrü ilə müqayisədə 320 min kilovatsaat artaraq 2,5 milyon kilovatsaata yaxın olmuşdur. Ödənişdə mütləq artım isə 12 faiz olmuşdur.

Onu da qeyd etmək yerinə düşərdi ki, cari ilin 4 ayı ərzində ümumi istehlak ötən ilin müvafiq dövrü ilə müqayisədə 3,1 milyon kilovatsaatdan çox artaraq 28,1 milyon kilovatsaata yaxın olmuşdur. Ötən ilin müvafiq dövrünə nisbətən ümumi ödəniş mütləq 12 faizə yaxın artıb. O cümlədən, daimi əhali istehlakçı qrupunda isə istehlak 12 milyon kilovatsaatdan artıq olmuşdur ki, bu da ötən ilin müvafiq dövrü ilə müqayisədə 2,8 milyon kilovatsaat çoxdur. Ödənişdə mütləq artım isə 9 faizə yaxındır. Sonda qeyd edək ki, sabit dayanıqlığın təmin edilməsi məqsədilə ənənəvi təmir-bərpa işləri davam etdirilir.