“Şirvan Elektrik Şəbəkəsi”ndə istismar səviyyəsinin daha da yaxşılaşdırılması məqsədilə zəruri tədbirlərin görülməsi ardıcıl şəkildə davam etdirilir. Əsas işlər 6-10 kilovoltluq elektrik verilişi xətləri üzrə aparılır. Şəhərin “Heydər Əliyev prospekti”ndə 6 kV-lik 1 saylı hava xəttində yeni dəmir-beton dayaqlar basdırılıb. Bunun ardınca 110 kilovoltluq “Cihazlar” yarımstansiyasından çıxan 10 kilovoltluq 1 və 3 saylı, o cümlədən 27 saylı xətlərin dayaqları tamamilə dəyişdirilib. Analoji tədbirlər “Naxçıvan” prospektində də aparılmaqdadır.

Tədbirlər çərçivəsində zərurət yaranan yerlərdə dayaq, naqil və izolyatorların daha yeni və keyfiyyətliləri ilə dəyişdirilməsi prosesi davam etdirilir. Bundan başqa, TM və KTM-lərin quraşdırılması və ehtiyac olan yerlərdə təmiri işləri icra olunur.

Sözügedən müəssisədən “Azərenerji” ASC-nin Mətbuat xidmətinə daxil olan məlumatda bildirildi ki, həmçinin bu il ərzində “Kür-most” deyilən ərazidəki transformator məntəqələrində də yenidənqurma tədbirləri aparılıb. Hazırda “Naxçı­van” prospektində kabelləşdirmə ilə əlaqədar əhali qrupu abonentlərini qidalandıran 0,4 kV-lik xətlərin dəyişdirilməsi istiqamətində işlər görülməkdədir.

Qeyd edək ki, şəbəkədə 2013-2014-cü il payız-qış mövsümü ilə əlaqədar yarımstansiyalar və elektrik verilişi xətlərində reallaşdırılacaq tədbirlər planına uyğun işlərə də artıq başlanılıb. Belə ki 110/35/6 kV-lik “Cənub” yarımstansiyasından çıxan güc kabelinin dəyişdirilməsi, 1000 kVA-lıq KTM-in quraşdırılması, yağ açarının bərpa olunması işləri birinci rüb ərzində icra olunub. İkinci rüb üçün nəzərdə tutulmuş işlərə gəldikdə isə bunlara nümunə olaraq  6 kV-lik 4 saylı hava xəttindən qidalanan transformator məntəqəsində 250 kVA-lıq  transformatorun 400 kVA-lıqla dəyişdirilməsi,  5 saylı hava xəttində 3 dayağın dəmir dayaqla, 300 metr uzunluğunda məftilin və 30 ədəd izol­yatorun yenisi ilə əvəzlənməsi  həyata keçirilməkdədir.

Sonrakı dövrlərdə isə 6 kV-lik 6 saylı hava xəttindən qidalanan 100 kVA KTM-in,  “Düşərgə” hava xəttindən qidalanan “Ofis” hava xəttinin budaqlanma yerində vakuum açarının quraşdırılması, 3 ədəd ayırıcının dəyişdirilməsi planlaşdırılıb. Dördüncü rübdə isə hava xətlərində xəttə toxunan ağacların kəsilməsi, güc kabelinin yenisi ilə əvəzlənməsi, yağ açarının müasir tipli vakuum açarla əvəzlənməsi həyata keçiriləcək.

Sonda onu da qeyd edək ki, ümumilikdə isə son dövrlər şəbəkədə həyata keçirilməkdə olan məqsədyönlü tədbirlər burada müsbət dinamikanın müşahidə olunmasını göstərir. Bu da həm ötürülən elektrik enerjisinin keyfiyyətinin daha da  artmasında, həm də istehlak olunan enerjinin dəyərinin təmin olunmasında açıq şəkildə hiss olunur.