Bütün enerji obyektlərində olduğu kimi “İmişli Regional Elektrik Şəbəkəsi”nin xidməti ərazisində yerləşən bütün yarımstansiyalarda, transformator məntəqələrində, o cümlədən, komplekt transformator məntəqələrində və elektrikötürücü xətlərdə cari ildə də təmir işləri yerinə yetirilmiş və hazırda bu istiqamətdə işlər davam etdirilir.

“İmişli” EŞ-dən  “Azərenerji” ASC-nin Mətbuat xidmətinə daxil olan məlumatda xidməti ərazidə yerinə yetirilmiş tədbirlər barədə geniş məlumat verilir.

Daxil olmuş məlumata əsasən, cari ilin son üç ayı ərzində 330 kV-lik “İmişli”, 35 kV-lik “Muğan”, “Rəsullu” yarımstansiyalarından çıxan 10 kV-lik, 35 kV-lik, “Sarxanlı” və “Məzrəli” yarımstansiyalarından çıxan 6 kV-lik hava elektrik verilişi xətləri üzrə ümumilikdə təxminən 5,6 kilometrdən artıq məsafədə  müxtəlif təyinatlı təmir işləri yerinə yetirilmiş, enerji daşıyıcılar normal iş rejiminə gətirilmişdir.

Təmir işlərinə 0,4 kV-lik EVX-lərdə aparılan yenidənqurma tədbirlərini də daxil etmək olar. Belə ki, EŞ-in xidməti ərazilərinə aid olan Əlipənahlı, Oruclu, Qaradonlu, Xəlifəli və digər bir neçə kəndlərdə və İmişli şəhəri ərazisində də 0,4 kV-lik qidalandırıcı EVX-lər üzrə   ümumilikdə  6,2 kilometrdən artıq məsafədə əsaslı və cari təmir işləri aparılmış və  istehlakçıların xidmətinə verilmişdir.

Qeyd edək ki, elektrik şəbəkəsi üzrə 10/0,4 kV-lik transformatorların  təmiri də həyata keçirilən tədbirlər sırasına aiddir. Müəssisədən verilən məlumata görə, son üç ay ərzində rayon üzrə 40-dan artıq müxtəlif güclü transformator təmir edilərək istismara verilmişdir.

Mənbəyə istinadən qeyd edək ki, cari ilin aprel ayında müəssisənin xidməti ərazisində keçirilmiş reydlər zamanı 140-dan çox istehlakçının elektrik enerjisindən istifadə qaydalarını pozması faktı aşkar edilmişdir. Aşkar edilmiş qayda pozuntuları müvafiq qaydada aktlaşdırılmış və 333,4 min  kilovatsaata yaxın itirilmiş elektrik enerjisinin 20 min manatdan artıq istehlak dəyəri bərpa edilmişdir.

Onu da qeyd edək ki, cari ilin 4 ayı ərzində isə burada 400-dən artıq qayda pozuntusu faktı aşkar edilərək akt tərtib olunmuşdur. Nəticədə 971,2 min kilovatsaata yaxın itirilmiş elektrik enerjisinin 58,3 min manata yaxın istehlak dəyəri bərpa edilmişdir. Həmin bu məbləğin 45 faizdən artıq hissəsinin ödənişi təmin edilmiş və qalan hissənin ödənilməsi istiqamətində isə müvafiq tədbirlər həyata keçirilir.

Mənbə onu da qeyd etdi ki, cari ilin aprel ayında müəssisənin xidməti ərazisində 17,1 milyon kilovatsaata yaxın elektrik enerjisi istehlak edilmişdir ki, bu da ötən ilin müvafiq dövründəki istehlakdan 3,5 milyon kilovatsaata yaxın çoxdur. Ödəniş isə ötən ilin müvafiq dövründəki göstəricidən mütləq 8,4 faiz çox olmuşdur. O cümlədən, daimi əhali istehlakçı qrupu üzrə istehlak ötən ilin müvafiq dövrü ilə müqayisədə 1,7 milyon kilovatsaata yaxın artaraq 5,3 milyon kilovatsaatdan artıq olmuşdur. Ödənişdə mütləq artım isə 10 faizdən artıq olmuşdur.

Mənbədən əldə etdiyimiz digər bir məlumat görə, cari ilin 4 ayı ərzində isə burada 81,6 milyon  kilovatsaata yaxın elektrik enerjisi istehlak edilib. Nəticədə ötən ilin müvafiq dövrü ilə müqayisədə istehlak 2,2 milyon kilovatsaatdan çox artmışdır. O cümlədən, daimi əhali istehlakçı qrupu üzrə istehlak ötən ilin müvafiq dövrü ilə müqayisədə 5,1 milyon kilovatsaata yaxın artaraq 25,3 milyon kilovatsaata yaxın olmuşdur. Ödənişdə mütləq artım isə 14 faizə yaxın olmuşdur.

Sonda onu da qeyd edək ki, ənənəvi xarakter alan təmir-bərpa işləri davam etdirlir və ölkə enerji təsərrüfatının daha da dayanıqlı və səmərəli fəaliyyətinin təmin ediməsi istiqamətində konkter addımlar atılır.