İtkilərin azaldılması qarşıda duran ən mühüm vəzifələrdən biridir. Bu istiqamətdə müvafiq tədbirlər müntəzəm olaraq davam etdirilir. Bütün Elektrik Şəbəkələrində (EŞ) olduğu kimi, “Goranboy” elektrik şəbəkəsində də (EŞ) elektrik enerjisindən qeyri-qanuni istifadənin qarşısının alınması istiqamətində xeyli işlər görülmüş və bu istiqamətdə tədbirlər davam etdirilir.

Sözügedən EŞ-dən “Azərenerji” ASC-nin Mətbuat xidmətinə daxil olan məlumata görə,  cari ilin aprel ayında keçirilmiş reydlər zamanı 44 istehlakçının (bunun 26-ı məişət abonenti (əhali) istehlakçılar qrupuna aiddir) sayğac uçot komplektində pozuntu faktı aşkar edilmişdir. Aşkar edilmiş qayda pozuntuları müvafiq qaydada aktlaşdırılmış və 242,4 min  kilovatsaata yaxın (bunun 79,3 min kilovatsaata yaxını məişət abonenti (əhali) istehlakçılar qrupuna aiddir) itirilmiş elektrik enerjisinin 14,5 min manatdan artıq istehlak dəyəri bərpa edilmişdir.

Qeyd edək ki, cari ilin 4 ayı ərzində isə 220 qayda pozuntusu (bunun 150-dən çoxu məişət abonenti (əhali) istehlakçılar qrupuna aiddir) aşkar edilərək 1 milyon 246,4 min kilovatsaatdan artıq (bunun 514,5 min kilovatsaatdan çoxu məişət abonenti (əhali) istehlakçılar qrupuna aiddir)  itirilmiş elektrik enerjisinin 73 min manata yaxın istehlak dəyəri bərpa edilmişdi. Həyata keçirilən müvafiq tədbirlər nəticəsində hesabat dövründə həmin bu məbləğin ödənişi təmin edilmişdir.

Mətbuat xidmətinə daxil olan digər bir məlumata istinadən, müəssisə üzrə təmir-bərpa işləri cari ilin son üç ayında da davam etdirilib. Məsələn, bu tədbirlər sırasına elektrik şəbəkəsindən qidalanan  Ağamalıqoğlu, Qaradağlı, Böyrük, Yenikənd və s. kəndləri daxil etmək olar ki, burada enerji itkisinin qarşısının alınması məqsədilə 0,4 kV-lik şəbəkələrin 4,4 kilometrə yaxın hissəsində müxtəlif təyinatlı təmir işləri aparılmış, travers quraşdırılmış, dayaq və izolyator dəyişdirilmişdir.

Onu da qeyd edək ki, analoji tımir işləri 10 kV-lik Xoylu, Qarasuçu, Səmədabad və digər EVX-lərdə aparılmış, 20 kilometrə yaxını isə əsaslı və cari təmir olunmuş, həmçinin 20 dayaq və eyni sayda travers quraşdırılmışdır. Eyni zamanda şəbəkə üzrə 30-a yaxın transformator məntəqəsində əsaslı və cari təmir aparılmış, bir neçəsinə yağ əlavə edilmişdir.

Cari ildə müəssisə üzrə istehlak edilmiş elektrik enerjisinin həcmi və enerji haqqlarının  ödənilməsi vəziyyəti ilə əlaqədar verilən məlumata əsasən bildirək ki, aprel ayında müəssisə üzrə 20,4 milyon kilovatsaatdan artıq elektrik enerjisi istehlak edilmişdir ki, bu da ötən ilin müvafiq dövrü ilə müqayisədə 2,2 milyon kilovatsaata yaxın çoxdur.  İstehlak edilmiş elektrik enerjisinin dəyərinin ödənişi isə ötən ilin müvafiq dövründəki göstəricidən mütləq 19 faizə yaxın çoxdur. O cümlədən, daimi əhali istehlakçı qrupunda isə istehlak ötən ilin eyni dövrü ilə müqayisədə 744 min kilovatsaata yaxın azalaraq 3,3 milyon kilovatsaatdan artıq olmuşdur. Ödənişdə mütləq artım 25 faizdən artıq olmuşdur.

Onu da qeyd etmək yerinə düşərdi ki, cari ilin 4 ayı ərzində ümumi istehlak ötən ilin müvafiq dövrü ilə müqayisədə 2.1 milyon kilovatsaatdan çox artaraq 71,1 milyon kilovatsaata yaxın olmuşdur. Ötən ilin müvafiq dövrünə nisbətən ümumi ödəniş mütləq 13 faizə yaxın artıb. O cümlədən, daimi əhali istehlakçı qrupunda isə istehlak 14 milyon kilovatsaata yaxın olmuşdur ki, bu da ötən ilin müvafiq dövrü ilə müqayisədə 4,1 milyon kilovatsaat azdır. Ödənişdə mütləq artım isə 11,2 faizdir. Sonda qeyd edək ki, dayanıqlığın müntəzəm olaraq təmin edilməsi məqsədilə ənənvi təmir-bərpa işləri davam etdirilir.