Ötən illər oduğu kimi, cari ilin ötən 4 ayı da “Tovuz Elektrik Şəbəkəsi”nin (EŞ) kollektivi üçün uğurlu olub. EŞ-dən “Azərenerji” ASC-nin Mətbuat xidmətinə daxil oıan məlumata görə, istehlakçıları daha da dayanıqlı və keyfiyyətli elektrik enerjisi ilə təmin etmək üçün müəssisənin xidməti ərazisində olan bütün hava elektrik verilişi xətlərində, eləcə də transformator məntəqələrində əsaslı və cari təmir işləri aparılıb. O cümlədən, son üç ay ərzində ümumi gücü 1,8 MVA-dan artıq olan 14 transformator təmir edilərək normal iş rejiminə gətirilmişdir. Eyni zamanda altı transformator məntəqəsində də müxtəlif təyinatlı təmiri şləri aparılmışdır. Bütün bunlarla yanaşı 10 və 6 kV-lik  xətlərin ümumilikdə iki km-dən, 0,4 kV-lik xətlərin isə bir km-dən artıq hissəsi təmir olunmuşdur.

Mənbə onu da bildirdi ki, təmir işləri ilə yanaşı elektrik enerjisindən qeyri qanuni istifadənin qarşısının alınması məqsədilə mütəmadi reydlər keçirilir. Aşkar edilmiş pozuntu halları ilə bağlı qanunvericilikdə nəzərdə tutulan tədbirlər görülüb. Belə ki, cari ilin aprel ayında  müəssisənin xidməti ərazisində keçirilmiş reydlər zamanı 27 istehlakçının sayğac uçot komplektində pozuntu faktı aşkar edilmişdir. Aşkar edilmiş qayda pozuntuları müvafiq qaydada aktlaşdırılmış və 114,4 min  kilovatsaata yaxın  itirilmiş elektrik enerjisinin 6,8 min manatdan artıq istehlak dəyəri bərpa edilmişdir. Hesabat ayında həmin bu məbləğin 38 faizə yaxın hissəsinin ödənişi təmin edilmişdir.

Qeyd edək ki, cari ilin dörd ayı ərzində isə sözügedən qayda pozuntusuna görə 190-dan artıq akt tərtib olunmuş, 982,3 min kilovatsaatdan çox itirilmiş elektrik enerjisinin 65,8 min manatdan yuxarı istehlak dəyəri bərpa edilmişdir. Həyata keçirilən müvafiq tədbirlər nəticəsində həmin bu məbləğin 43 faizə yaxın hissəsinin ödənişi təmin edilmiş və qalan hissənin ödənilməsi istiqamətində isə müvafiq tədbirlər həyata keçirilir.

Yeri gəlmişkən, cari ildə aşkar edilmiş qayda pozuntularına görə müvafiq tədbirlərin görülməsi üçün iki istehlakçıın sənədləri hüquq mühafizə orqanlarına göndərilmişdir.

Onu da qeyd edək ki, cari ilin aprel ayında müəssisə üzrə 10,5 milyon kilovatsaata yaxın elektrik enerjisi istehlak edilmişdir ki, bu da ötən ilin eyni dövründəki istehlakdan 159 min kilovatsaat çoxdur. O cümlədən, daimi əhali istehlakçı qrupunda isə istehlak ötən ilin eyni dövrü ilə müqayisədə 260 min kilovatsaat artaraq 4,2 milyon kilovatsaata yaxın olmuşdur. Ödənişdə mütləq artım 9 faiz təşkil etmişdir.

Onu da qeyd etmək yerinə düşərdi ki, cari ilin 4 ayı ərzində isə 39,6 milyon kilovatsaata yaxın elektrik enerjisi istehlak edilmişdir ki, bu da ötən ilin müvafiq dövründəki göstəricidən 3,8 milyon kilovatsaata yaxın azdır. O cümlədən, daimi əhali istehlakçı qrupunda isə bu göstəricilər müvafiq olaraq 17,5 milyon kilovatsaata və 1,8 milyon kilovatsaata yaxın olmuşdur. Ödənişdə isə mütləq artım 9 faiz olmuşdur.

Sonda onu da qeyd edək ki, ümumiyyətlə, istehlakçıların elektrik enerjisinə tələbatının daha da dayanıqlı ödənilməsi enerji təchizatçılarının başlıca vəzifəsidir. Tovuz rayon elektrik şəbəkəsinin kollektivi də bu vəzifəni layiqincə yerinə yetirmək üçün bütün imkanlarını səfərbər ediblər.