“Zaqatala Elektrik Şəbəkəsi”ndə elektrik təsərrüfatının fəaliyyətini daha da yaxşılaşdırmaq, istehlakçıların elektrik enerjisi ilə fasiləsiz təchizatını təmin etmək məqsədilə zəruri işlər həyata keçirilib. Rayonda istehlak olunan elektrik enerjisi haqqının tam şəkildə ödənilməsinin təmin edilməsi istiqamətində vəziyyət qənaətbəxşdir.

Sözügedən müəssisədən “Azərenerji” ASC-nin Mətbuat xidmətinə daxil olan məlumata görə, ra­yonun elektrik enerjisi ilə təminatında dayanıqlığın təmin edilməsi məqsədi ilə yarımstansiyalarda əsaslı və cari təmir işləri aparılıb, yenidənqurma işləri yüksək gər­ginlikli elektrik şəbəkəsində də davam etdirilib. İş qrafikinə uyğun olaraq dayaqlar təmir edilib, xətlərin keçdiyi ərazi yaşıl kütlədən təmizlənib.

“Şəbəkədə təmir-bərpa işləri də davam etdirilir”, – deyən mənbə onu da bildirdi ki, hesabat dövründə 10, 6 kV-lik xətlərin 2 kilometrə yaxın, 0,4 kV-lik xətlərin isə 3,8 kilometr hissəsi təmir olunub. 2,3 kilometr uzunluğunda SİP kabel çəkilib, 420-dən artıq sayğac quraşdırılıb. 14 ədəd KTM və 14 ədəd TM-də təmir işləri həyata keçirilib.

Qeyd edək ki, görülən zəruri tədbirlər istismar səviyyəsini yüksəldib, istehlakçıların elektrik enerjisi ilə təminatında müsbət dəyişikliklər yaradıb. Hazırda qarşıda duran ən mühüm vəzifə istehlakçılara göstərilən  xidmətin keyfiyyətinin daha da yüksəldilməsi ilə yanaşı, istehlak edilmiş elektrik enerjisinin sərfinə görə ödənişlərin 100 faizə çatdırılmasıdır.

Mənbə onu da bildirdi ki, şəbəkənin xidməti ərazisində elektrik enerjisindən sayğacdankənar istifadə hallarına, az da olsa, təsadüf edilir. Əsasən ucqar kəndlərdə baş verən belə halları aşkarlamaq üçün hər gün reydlər keçirilir. Aşkar olunan faktlar üzrə akt tərtib olunur. Belə ki, bu ilin birinci rübü ərzində keçirilən reydlər zamanı 100-dən artıq qayda pozuntusu aşkar edilərək 200 min kilovat-saata yaxın itirilmiş elektrik enerjisinin istehlak dəyəri bərpa edilib. Müəyyən olunmuş məbləğin 70  faizdən çox hissəsinin ödənişi təmin edilib və qalan hissənin ödənilməsi istiqamətində müvafiq tədbirlər həyata keçirilir.

Yeri gəlmişkən, şəbəkədə əməyin mühafizəsi məsələləri də gündəlik nəzarətdədir. İşçilər hələ ilk günlərdən təhlükəsizlik tədbirlərinə uyğun olaraq xüsusi geyim və ləvazimatlarla təmin olunur, texniki təhlükəsizlik və əməyin mühafizəsi ilə bağlı mütəmadi olaraq təlimatlandırılırlar. Həmçinin işçilərin peşəkarlıq səviyyələrinin yüksəldilməsinə daim diqqət yetirilir.