Digər enerji müəssisələrində olduğu kimi Cənub bölgəsinin enerji təminatçısı sayılan “Şirvan EŞ”in inzibati ərazisinə daxil olan Şirvan rayonunda isteklaçıların daha da dayanıqlı və keyfiyyətli elektrik enerji ilə təmin olunması məqsədilə balans mənsubiyyətinə aid olan yarımstansiyalarda, transformator və komplekt transformator məntəqələrində, elektrik verilişi xətlərində yenidənqurma işləri mütəmadi davam etdirilir. Görülmüş tədbirlər nəticə verir, o cümlədən  enerji daşıyıcılarında ifrat yüklənmə və açılma hallarına rast gəlinmir.

“Sirvan Elektrik Şəbəkəsi”ndən (EŞ) “Azərenerji” ASC-nin Mətbuat xidmətinə daxil olan məlumata görə, son üç ay ərzində rayon ərazində yenidənqurma tədbirləri çərçivəsində “smart” kart tipli sayğacların quraşdırılması ilə əlaqədar 3,2 kilometrə yaxın koaksal kabel çəkilmiş və 0,4 km xətlərin 550 metri SİP kabellə əvəzlənmişdir. Eyni zamanda, 6 və 0,4 kV-lik xətlərin ümumilikdə 1,4 kilometrdən artıq hissəsi əsaslı təmir olunmuşdur.

Qeyd edək ki, sözügedən dövrdə müəssisənin balans mənsubiyyətinə aid olan 20-dən artıq transformator məntəqəsində (TM) müxtəlif təyinatlı təmir işləri aparılmış və 400 kVA gücündə bir transformator da əsaslı təmir edilərək istehlakçıların xidmətinə verilmişdir.

Mənbədən əldə edilən digər bir məlumata görə, müəssisənin xidməti ərazisində cari ilin aprel ayında keçirilmiş reydlər zamanı bir istehlakçının sayğac uçot komplektində qüsur aşkar edilərək 5,8 min kilovatsaata yaxın itirilmiş elektrik enerjisinin 345 manatdan çox istehlak dəyəri bərpa edilmişdir. Hesabat ayında həmin bu məbləğlə yanaşı ötən aylardan aktlara görə yaranmış debitor borcun da müəyyən hissəsinin ödənişi təmin edilmişdir.

Onu da qeyd edək ki, burada cari ilin 4 ayı ərzində keçirilmiş reydlər zamanı 16 istehlakçının qayda pozması faktı aşkar edilərək 329,7 min kilovatsaatdan artıq itirilmiş elektrik enerjisinin 19,8 min manata yaxın istehlak dəyəri bərpa edilmişdir. Həyata keçirilən müvafiq tədbirlər nəticəsində hesabat dövründə həmin bu məbləğin 22 faizdən artıq hissəsinin ödənişi təmin edilmiş və qalan hissənin ödənilməsi istiqamətində isə müvafiq tədbirlər həyata keçirilir.

“İcra edilən təmir-bərpa işləri nəinki istehlakçıların enerji təminatının yaxşılaşdırılmasına, eyni zamanda iqtisadi göstəricilərin daha da yüksəldilməsinə xidmət edir”, – deyən mənbə onu da bildirdi ki, cari ilin aprel ayında müəssisənin xidməti ərazisində 24,9 milyon kilovatsaata yaxın elektrik enerjisi istehlak edilmişdir ki, bu da ötən ilin müvafiq dövründəki istehlakdan 2,2 milyon kilovatsaata yaxın azdır. Ödənişdə mütləq artım isə 43 faizə yaxın olmuşdur. O cümlədən, daimi əhali istehlakçı qrupu üzrə istehlak ötən ilin müvafiq dövrü ilə müqayisədə 723 min kilovatsaata yaxın artaraq 3 milyon kilovatsaata yaxın, ödənişdə isə mütləq artım 26 faizdən çox olmuşdur. Mənbədən əldə etdiyimiz digər bir məlumat görə, cari ilin 4 ayı ərzində burada 106,9 milyon  kilovatsaata yaxın elektrik enerjisi istehlak edilib. Nəticədə ötən ilin müvafiq dövrü ilə müqayisədə istehlak 9,5 milyon kilovatsaata yaxın azalmış, ödəniş isə mütləq 39 faizə yaxın artmışdır. O cümlədən, daimi əhali istehlakçı qrupu üzrə istehlak ötən ilin müvafiq dövrü ilə müqayisədə 1,3 milyon kilovatsaatdan çox azalaraq 17,3 milyon kilovatsaatdan artıq olmuşdur. Ödənişdə mütləq artım isə 19 faizə yaxın olmuşdur.