“Sumqayıt Elektrik Şəbəkəsi”nin (EŞ) xidmət göstərdiyi ərazilərdə elektrik enerjisi təchizatının daha da yaxşılaşdırılması ilə bağlı ardıcıl və məqsədyönlü tədbirlər həyata keçirilir. Enerji təsərrüfatında aparılan məqsədyönlü tədbirlər öz bəhrəsini verməkdədir.

Müəssisədən “Azərenerji” ASC-nin Mətbuat xidmətinə daxil olan məlumata görə, cari ilin mart ayında EŞ-in ərazisində həyata keçirilmiş geniş miqyaslı reydlər zamanı 285 istehlakçının (bunun 260-dan çoxu məişət abonenti (əhali) istehlakçıları qrupuna aiddir) elektrik enerjisindən istifadə qaydalarını pozduğu aşkarlanıb. Müvafiq qaydada aktlar tərtib olunmaqla, 1 milyon 206,9 min  kilovatsaata yaxın (bunun 653,6 min kilovatsaata yaxını məişət abonenti (əhali) istehlakçıları qrupuna aiddir) itirilmiş elektrik enerjisinin 72,3 min manatdan çox istehlak dəyəri bərpa edilib.

Qeyd edək ki, cari ilin I rübü ərzində isə 1000-dən artıq (bunun 960-a yaxını məişət abonenti (əhali) istehlakçıları qrupuna aiddir) qayda pozuntusu faktı aşkar olunmuş, 2 milyon 802,5 min kilovatsaatdan artıq (bunun 2 milyon 130,9 min kilovatsaatdan çoxu məişət abonenti (əhali) istehlakçıları qrupuna aiddir) itirilmiş elektrik enerjisinin 168,2 min manata yaxın istehlak dəyəri bərpa edilmişdir. Həyata keçirilən müvafiq tədbirlər nəticəsində həmin bu məbləğin 65 faizə yaxın hissəsinin ödənişi təmin edilmiş və qalan hissənin ödənilməsi istiqamətində isə müvafiq tədbirlər həyata keçirilir.

Mənbəyə istinadən onu da qeyd edək ki, ötən ilin müvafiq dövrünə nisbətən cari ilin mart ayında rayon üzrə elektrik enerjisi istehlakı 3,4 min kilovatsaata yaxın azalaraq 82,7 milyon kilovatsaatdan artıq olmuşdur. İstehlak edilmiş elektrik enerjisinin dəyərinin ödənişi isə ötən ilin eyni dövrü ilə müqayisədə mütləq 22 faiz artmışdır. O cümlədən daimi əhali istehlakçı qrupunda isə istehlak ötən ilin müvafiq dövrü ilə müqayisədə 21,2 faiz azalaraq 19,5 milyon kilovatsaatdan artıq olmuşdur.

Yeri gəlmişkən, cari ilin I rübü ərzində ümumilikdə 259,7 milyon kilovatsaatdan artıq elektrik enerjisi istehlak edilmişdir ki, bu da ötən ilin müvafiq dövründəki göstəricidən 858 min kilovatsaat azdır. Ödəniş isə ötən ilin müvafiq dövründəki göstəricidən mütləq 14 faiz çoxdur. O cümlədən, daimi əhali istehlakçı qrupunda isə istehlak ötən ilin müvafiq dövründəki istehlakla müqayisədə 9,4 faiz azalaraq 67,8 milyon kilovatsaata yaxın olmuşdur. Ödənişdə mütləq artım isə 14 faizə yaxın olmuşdur.

Mənbədən onu da bildirdilər ki, son üç ay ərzində  10, 6 və 0, 4 kV-lik 55 kabel xəttində təmir işləri reallaşdırılmış, 6 kV-lik 4,9 km-ə yaxın kabel xətti, 1,5 km 10 kV-lik HX və 0,4 kV-lik xətlərdə aparılan yenidənqurma işləri ilə bağlı 16,5 km-dən artıq müxtəlif markalı SİP xətləri çəkilmişdir. Eyni zamanda TM və KTM-lərin yenidənqurulması və təmiri qrafikinə uyğun olaraq, həmin bu dövrdə 40-a yaxın TM-də müxtəlif təyinatlı təmir işləri  həyata keçirilmiş və ümumi gücü 3,6 MVA-ya yaxın olan 6 yeni transformator da quraşdırılmışdır.