Ənənəvi xarakter alan təmir-bərpa və yenidənqurma işləri ölkənin bütün enerji obyektlərində uğurla yerinə yetirlir.

“Azərenerji” ASC-nin Mətbuat xidmətinə “Sumqayıt Regional Elektrik Şəbəkəsi”ndən daxil olan məlumata görə, Abşeron rayonunda 110/35/10 kilovoltluq bir, 35/10 kilovoltluq üç, 35/6 kilovoltluq iki yarımstansiyanın tikilməsi nəzərdə tutulub. Onların inşası üçün ərazi ayrılıb və həmin yerlərdə geodeziya işləri aparılır.

Mənbəyə istinadən qeyd edək ki, Qobustan, Xızı və Şamaxı rayonlarının energetika təsərrüfatlarında da keçən ilin üçüncü rübündə müəyyən işlər aparılıb. Lakin sonrakı dövrlərdə hava şəraitinə uyğun olaraq, əsasən istismarla bağlı cari işlər görülüb. Bu ilin ikinci rübündən həmin rayonlarda da qrafik üzrə tədbirlər reallaşdırılacaq.

Keçən il Şamaxı rayonunun mərkəzi sip-kabellə təmin olunub. Şəhərdaxili 10 kV-lik hava verilişi xətlərinin 30 faizə yaxınında bu işlər başa çatıb. 35 kV-lik “Pirqulu” hava xəttinin 20 faizdən çox hissəsində ikidövrəli xətt çəkilib. Cari ildə isə bütün kənd və qəsəbələrə gedən 6 kV-lik naqillərin yeniləşdirilməsi nəzərdə tutulub.

Qobustan rayonunu qidalandıran 35 kV-lik “Şamaxı-Mərəzə” hava xəttində bəzi  yerlərdə dayaq və  naqillərin dəyişdirilməsi həyata keçirilib.

Mərəzədə Heydər Əliyev küçəsi boyunca 0,4 kV-lik naqillərin hamısı SİP-kabellərlə əvəzlənib. Başlanan işlərin ikinci rübdə davam etdirilməsi nəzərdə tutulur.

Xızı rayonunda ehtiyac duyulan yerlərdə dayaq və naqillərin yenisi ilə əvəzlənməsi və xətlər boyu ərazinin yaşıl kütlədən təmizlənməsi həyata keçirilib. Rayon mərkəzini qidalandıran xətt yeniləşdirilməklə ikidövrəli xəttin çəkilməsinə nail olunub. Bundan başqa, rayon mərkəzinin təxminən 60 faizi SİP-kabellə təchiz olunub. İkinci rübdən başlayaraq, burada işlərin davam etdirilməsi nəzərdə tutulub. Bütün bunlar elektrik enerjisi verilişində dayanıqlığın daha da möhkəmləndirilməsini təmin edəcəkdir.