Bütün enerji obyektlərində olduğu kimi “İmişli Regional Elektrik Şəbəkəsi”nin xidməti ərazisində yerləşən bütün yarımstansiyalarda, transformator məntəqələrində, o cümlədən, komplekt transformator məntəqələrində və elektrikötürücü xətlərdə də yenidənqurma işləri yerinə yetirilmişdir.

“İmişli” REŞ-dən  “Azərenerji” ASC-nin Mətbuat xidmətinə daxil olan məlumatda REŞ-in balans mənsubiyyətinə daxil olan “Sabirabad” və “Zərdab” elektrik şəbəkələri üzrə yerinə yetirilmiş tədbirlər barədə geniş məlumat verilir.

Qeyd edək ki, “Sabirabad” EŞ-nin enerji təchizatı  74 ədəd 10-6  kV-lik EVX, ümumi gücü 245,4 MVA-dan artıq olan 1417 ədəd 10(6)/0,4 kV-lik transformatorlar vasitəsilə təmin olunur.

Daxil olmuş məlumata əsasən, cari ilin birinci rübü ərzində 110 kV-lik “Sabirabad”, “Cavad”, 35 kV-lik “Sarxanbəyli”, “Vidadi-2”, “Həşimxanlı” və “Kürəkəndi” yarımstansiyalarından çıxan 10 kV-lik hava elektrik verilişi xətləri üzrə ümumilikdə təxminən 5 kilometrə yaxın məsafədə  müxtəlif təyinatlı təmir işləri yerinə yetirilmiş, enerji daşıyıcılar normal iş rejiminə gətirilmişdir.

Təmir işlərinə 0,4 kV-lik EVX-lərdə aparılan yenidənqurma işlərini də daxil etmək olar. Belə ki, REŞ-in xidməti ərazilərinə aid olan Məmişlər, Qalağayın, Cavad, Narlıq, Həsənkənd, Şəhriyar, Surra, Həşimxanlı, Quzma, Zəngənə, Axtaçı, Saraxanbəyli, Kovlar, Qaragüney, Qaratoğay, Ulacalı kəndlərində və Sabirabad şəhəri ərazisində də qidalandırıcı 0,4 kV-lik EVX-lər üzrə   ümumilikdə  6 kilometrə yaxın məsafədə əsaslı və cari təmir işləri aparılmış və  istehlakçıların istifadəsinə verilmişdir. Elektrik şəbəkəsi üzrə 10/0,4 kV-lik transformatorların  təmiri də birinci rübdə həyata keçirilən tədbirlər sırasına aiddir. Müəssisədən verilən məlumata görə, rayon üzrə 40-dan artıq müxtəlif güclü transformator cari yaxud əsaslı təmir edilərək istismara verilmişdir.

REŞ-in balans mənsubiyyətinə daxil olan “Zərdab” EŞ-də də müvafiq işlər uğurla həyata keçirilmişdir. Məlumat üçün qeyd edək ki, EŞ-in enerji təchizatı 24  ədəd 10 kV-lik EVX-lər, ümumi gücü 60 MVA-ya yaxın olan 476 ədəd 10/0,4 kV-lik transformatorlar vasitəsilə təmin olunur. EŞ-üzrə təmir işləri 35 kV-lik “Zərdab”, “Seyidlilər”və “Məlikli” yarımstansiyalarından çıxan 10 kV-lik hava elektrik verilişi xətlərində aparılmışdır. Qeyd edək ki, təmir-bərpa işləri ümumilikdə 3 kilometrə yaxın  məsafədə yerinə yetrilib.

Onu da bildirək ki, rayonun Alcanlı, Qərəvəlli, Pərvanlı, Çallı, Gəlmə, Əlvənd, Lək, Şıxbağı, Bəyimli, Şəftəhal, Ağamalılar, Mehtililər, Məmmədqasımlı kəndlərində və Zərdab şəhəri ərazisində 0,4 kV-lik EVX-lər boyu təxminən 3 kilometrə yaxın məsafədə əsaslı və cari təmir işləri görülüb.  Mətbuat xidmətinə daxil olan məlumatda ötən rüb ərzində rayon üzrə 20-dən artıq müxtəlif güclü transformatorda təmir işləri aparılmış və normal vəziyyətdə abonentlərin istifadəsinə verilmişdir.

Qeyd edək ki, ənənəvi xarakter alan təmir-bərpa işləri davam etdirilir və ölkə enerji təsərrüfatının daha da dayanıqlı və səmərəli fəaliyyətinin təmin ediməsi istiqamətində konkter addımlar atılır.