Hazırda enerjisistemdə mövcud olan və yeni yaradılmış potensial generasiya gücləri ilə yanaşı, vacib məsələlərdən biri də istehsal olunan elektrik enerjisinin vaxtında və keyfiyyətli şəkildə tələbatçılara çatdırılmasıdır. Bu məsələnin həllində elektrik verilişi xətləri və yarımstansiyaların normal fəaliyyət göstərmələri mühüm rol oynayır. Bu məqsədlə ötən ildə də digər enerji obyektlərində olduğu kimi, respublikanın şimal bölgəsinin enerji təminatında mühüm rol oynayan “Xaçmaz REŞ”də ənənəvi yenidənqurma və təmir-bərpa işləri yerinə yetirilimişdir.

Sözügedən REŞ-dən “Azərenerji” ASC-nin Mətbuat xidmətinə daxil olan məlumata görə, ötən ilin son üç ayı ərzində müəssisənin balans mənsubiyyətinə daxil olan bir sıra enerji obyektlərində cari və əsaslı təmir işləri uğurla yerinə yetirilmişdir. Yerinə yetirilən tədbirlər sırasına 110 kV-lik “Quba”, “Rəhimli”, “Şabran” və digər yarımstansiyalarda vakuum açarlarının təmir edilməsi, transformatorların giriş yağ açarlarının yeniləri ilə əvəz edilməsi, sınaq ölçü işləri aparılaraq rele mühafizə dövrələrinin yoxlanılması və s. daxil olmaqla müxtəlif təyinatlı işlər həyata keçirilmişdir. Eyni zamanda “Rəhimli” yarımstansiyasında iki yuva quraşdırılaraq 10 kilometrdən artıq yeni iki dövrəli “Ayğünlü” və “Şahnəzərli” HX-də çəkilmişdir. Qeyd edək ki, analoji təmir işləri 35 kV-lik “Quba”, “Alpan” və “Nügədi” yarımstansiyalarında (YS) da aparılmışdır.

Müəssisənin xidməti ərazisində həyata keçirilən digər layihələrlə bağlı mənbə onu da bildirdi ki, sözügedən dövrdə yeni 35 kV-lik “Təngəaltı”, “Qəçreş” YS-lərin tikintisi tamamlanmış, müvafiq hava elektrik verilişi xətlərinin (HEVX) çəkilişi davam etdirilir. Eyni zamanda 110 kV-lik “Quba” yarımstansiyasında 35 kV-lik yeni paylayıcı quruluşun bünövrəsi qoyulmuş və kabel kanalları çəkilmişdir. Yeri gəlmişkən, 110 kV-lik “Şabran”, “Rəhimli”, “Pirəbədil” YS-lərdə yağ açarlarının yeni vakuum tipli açarlarla əvəzlənməsi, perspektiv inkişafla əlaqədar “Yalama” YS-də 1 saylı 16 MVA-lıq transformatorun ayıran ayrıcının eleqaz tipli açarla əvəzlənməsi, yeni su anbarı və ehtiyat yağ anbarının tikintisi, “Xudat” YS-də isə 1 saylı 16 MVA-lıq transformatorun ayıran ayrıcının eleqaz tipli açarla əvəzlənməsi, I və II bölmədə cərəyan transformatorlarının və boşaldıcıların dəyişdirilməsi nəzərdə tutulmuşdur.

Təmir işləri 330,  110 və 35 kV-lik HEVX-lərdən də yan keçməmişdir. Beləki, sözügedən dövrdə “Dərbənd”, I, VIII “Xaçmaz”, “Çarxı”, “Xudat Yalama”, “Quba-Qusar” “Kanal” və digər HEVX-də ümumiulikdə 400-dən artıq izolyator yenisi ilə əvəz edilmişdir.

Bütün bu işlərlə yanaşı, yarımstansiyalarda yanğın təhlükəsizliyinin təmin edilməsi istiqamərində də müvafiq tədbirlər yerinə yetirilib. Belə ki, güc transformatorlarında yağ sızmaları aradan qaldırılmış, su hovuzları su ilə doldurulmuş və digər zəruri təhlükəsizlik tədbirləri yerinə yetirilimişdir.

Sonda onu da qeyd edək ki, müvafiq enerji obyektlərində aparılan yenidənqurma işləri istehlakçıların  mövcud iqlim şəraitində enerjiyə olan tələbatını daha da dayanıqlı və effektli ödənilməsinə yardımçı olmuşdur.