Ölkə elektrik enerjisi sisteminin flaqmanı sayılan “Azərbaycan İstilik Elektrik Stansiyası”ndan (İES)  “Azərenerji” ASC-nin Mətbuat xidmətinə daxil olan məlumata görə, sözügedən stansiyanın kollektivi cari ilin 11 ayını da yüksək işgüzarlıq əhval-ruhiyyəsi ilə yola salıblar. O cümlədən, noyabr ayının göstəriciləri  də qənaətbəxşdir.  Qeyd edək ki, cari ilin noyabr ayında stansiyada 708,9 milyon kilovatsaatdan artıq elektrik enerjisi istehsal edilmişdir. Сari ilin 11 ayı ərzində isə burada 6 milyard 913,3 milyon kilovatsaata yaxın elektrik enerjisi istehsal olunmuşdur.

Yeri gəlmişkən, həyata keçirilən müxtəlif profilaktik tədbirlər nəticəsində avadanlıqların istismar səviyyəsi daha da  yüksəlmişdir ki, bu da elektrik stansiyasının digər texniki iqtisadi göstəricilərində də müəyyən nailiyyətlərin əldə olunmasına imkan vermişdir. Hazırda stansiya dispetçer  qrafikinə uyğun fəaliyyətini davam etdirir.

Mənbədən onu da bildirdilər ki, respublika enerji sisteminin bütün sahələrində olduğu kimi, “Azərbaycan İES”də də stansiyanın mövcud vəziyyətə uyğun normal fəaliyyətini davam etdirməsi üçün, o cümlədən stansiyanın qış mövsümünə hazırlığı, avadanlıqların keyfiyyətli istismarının təşkil olunması, qəza və imtinaların sayının minimuma endirilməsi məqsədilə bütün zəruri tədbirlər ardıcıllıqla həyata keçirilmişdir. Belə ki, cari ili son üç ayı ərzində iki enerji blokunda əsaslı, digər enerji bloklarının hər birində isə cari təmir işləri aparılmışdır. Onu da qeyd etmək yerinə düşədi ki, 5 saylı enerji blokunun idarəetmə  sistemlərinin yenidən qurulması və digər avadanlıqlarında əsaslı təmir işinə başlanılmışdır.

Hesabat dövründə 500 kV-lik yarımstansiyada isə üç ədəd hava açarı təmir olunmuşdur. Eyni zamanda 330 və 500 kV-lik yarımstansiyaların ərazisində kollektor-drenaj şəbəkəsi qurulmuşdur. Bütün bunlarla yanaşı 2 saylı tunelin tikintisi ilə bağlı olaraq müvafiq işlər davam etdirilmişdir. Bununla bərabər, hazırda 5 saylı enerji blokunda yenidənqurma, 500 kV-lik yarımstansiyada hava açarlarının təmiri, köməkçi istehsal sahələrində avadanlıq, bina və qurğularda təmir-proflaktika və 2 saylı tuneldə tikinti işləri davam etdirilir.

Yanğın təhlükəsizliyi ilə əlaqədar verilən məlumatda isə bildirilir ki, stansiyada yanğınsöndürmə su xətləri və nasosxana saz vəziyyətə gətirilmiş, avtomatik yanğınsöndürmə sistemləri təftiş edilmiş, ərazi quru otlardan təmizlənmiş və digər qabaqlayıcı tədbirlər görülmüşdür.