İstehlakçıların elektrik enerjisinə olan tələbatını tam və keyfiyyətli şəkildə ödəmək məqsədilə paylayıcı elektrik şəbəkəsi  müəssisələrində mühüm addımlar atılır. Qeyd edək ki, hazırda payız-qış mövsümünə hazırlıq çərçivəsində həm yarımstansiyalarda, transformator və komplekt transformator məntəqələrində, həm də xətlərdə cari və əsaslı təmir işləri həyata keçirilir.

«Qax» elektrik şəbəkəsindən (EŞ) “Azərenerji” ASC-nin Mətbuat xidmətinə daxil olan məlumata görə, cari ilin son üç ayında müəssisənin balans mənsubiyyətinə aid olan 10 kV-lik “Qorağan”, II-III “Şəhər” HX-lərində həyata keçirilmiş müxtəlif təyinatlı təmir işləri zamanı ümumilikdə 46 km-ə yaxın xətt təmir edilmişdir. Paralel olaraq təmir işləri 0,4 kV-lik xətlərdə də aparılmış və 15 km-dən artıq xətt təmir olunmuşdur. Qeyd edək ki, təmir işləri müəssisənin balans mənsubiyyətinə aid olan TM-lərdə də həyata keçirilmişdir. Sözügedən dövrdə 17 TM-də müxtəlif təyinatlı təmir işləri reallaşmışdır.

Onu da qeyd etmək yerinə düşərdi ki, müəssisənin xidməti ərazisində cari ilin sentyabr ayında  keçirilmiş reydlər zamanı 17 qayda pozuntusu faktı aşkar edilərək müvafiq qaydada aktlaşdırılmışdır. Nəticədə 25 min kilovatsaata yaxım itirilmiş elektrik enerjisinin 1,5 min manata yaxın istehlak dəyəri bərpa edilmişdir. Ümumiyyətlə isə, burada 2013-cü ilin 9 ayı ərzində 140-dan artıq  qayda pozuntusu faktı aşkar edilərək 238,1 min kilovatsaata yaxın itirilmiş elektrik enerjisinin 14,3 min manata yaxın istehlak dəyəri bərpa edilmişdir. Həyata keçirilən müvafiq tədbirlər nəticəsində həmin bu məbləğin 96 faizdən artıq hissəsinin ödənişi təmin edilmiş və qalan hissənin ödənilməsi istiqamətində isə müvafiq tədbirlər həyata keçirilir.

Onu da qeyd edək ki, müəssisə üzrə cari ilin sentyabr ayında ümumilikdə 3,1 milyon kilovatsaatdan artıq elektrik enerjisi istehlak edilmişdir ki, bu da ötən ilin eyni dövründəki istehlakdan 57 min kilovatsaata yaxın çoxdur. Ödəniş isə ötən ilin eyni dövrü ilə müqayisədə mütləq 1 faizə yaxın artmışdır. O cümlədən, daimi əhali istehlakçı qrupunda isə 1,7 milyon kilovatsaatdan artıq elektrik enerjisi istehlak edilmişdir. Ötən ilin müvafiq dövrü ilə müqayisədə istehlak 93 min kilovatsaata yaxın azalmışdır. Onu da qeyd etmək yerinə düşərdi ki, cari ilin 9 ayı ərzində isə ümumi istehlak ötən ilin müvafiq dövrü ilə müqayisədə 1,8 milyon kilovatsaata yaxın artaraq 27,1 milyon kilovatsaata yaxın olmuşdur. Ödənişdə mütləq artım isə 13 faizdən artıq olmuşdur.  O cümlədən, daimi əhali istehlakçı qrupunda isə istehlak 16,3 milyon kilovatsaata yaxın olmuşdur. Nətəcədə ötən ilin müvafiq dövrü ilə müqayisədə istehlak 335 min kilovatsaata yaxın, ödəniş isə mütləq 6 faizdən çox artmışdır.

Yeri gəlmişkən, mövcud iqlim şəraiti ilə bağlı  yanğın təhlükəsizliyi məsələsi daima diqqət mərkəzində saxlanılır. TM-lərin ərazisi quru otlardan təmizlənmiş və yağ tutumlu avadanlıqların alt hissəsindəki yağ çınqıllar yeni təmiz çınqıllarla əvəz edilmiş, ərazi yanğın törədə biləcək tullantılardan təmizlənmiş və EVX-lərin  trassası yaşıl kütlədən təmişlənmişdir.  Sonda onu da bildirək ki, növbəti mövsümün uğurla başa çatdırılması istiqamətində enerji təchizatçıları öhdələrinə düşən vəzifələri layiqincə yerinə yetirməyə çalışırlar.