Ən müasir texnologiyaların tətbiqi ilə tikilərək istifadəyə verilmiş “Bakı Elektrik Stansiyası”nda da aqreqatlarda planlı təmir-sazlama işləri texniki xidmət qrafikinə əsasən aparılır. Hal-hazırda aqreqatlar dispetçer qrafikinə uyğun olaraq fəaliyyət göstərir.

Elektrik stansiyasından  “Azərenerji” ASC-nin Mətbuat xidmətinə daxil olan məlumata görə, stansiyada cari ilin avqust ayında 36,6 milyon kilovatsaata yaxın elektrik enerjisi istehsal edilmişdir.

Qeyd edək ki, cari ilin 8 ayı ərzində isə 346,4 milyon kilovatsaata yaxın elektrik enerjisi istehsal edilmişdir.

Onu da qeyd edək ki, avadanlıqların iş səmərəliliyinin artırılması, enerjinin ötürülməsi və paylaşdırılması sistemlərinin dayanıqlı, sabit işləməsinin və istismar səviyyəsinin  yüksəldilməsi istiqamətində həyata keçirilmiş məqsədyönlü tədbirlər nəticəsində elektrik enerji istehsalı üzrə digər texniki göstəricilərdə də müsbət nailiyyətlər əldə edilmişdir.

Mənbədən əldə etdiyimiz digər bir məlumatda o da bildirilir ki, cari ilin son üç ayı ərzində də aqreqatlarda müxtəlif təyinatlı təmir işləri həyata keçirilmiş, növbəti istismar həddinə uyğun isə texniki xidmət işləri aparılmışdır. Yeri gəlmişkən, aparılan təmir işləri stansiyanın işçi heyəti tərəfindən həyata keçirilmişdir.

Mənbəyə istinadən onu da qeyd edək ki, stansiyanın elektrik avadanlıqlarına da baxışlar keçirilmiş, aqreqatlarda qrafik üzrə texniki xidmət işləri aparılmış və 110 kV-lik yarımstansiyanın avadanlıqlarında cari təmir işləri görülmüşdür. Payız-qış mövsümü ilə əlaqədar bir sıra qabaqlayıcı tədbirlər də görülmüşdür.

Onu da qeyd etmək yerinə düşərdi ki, təmir işləri güc transformatorundan, eleqaz açarlardan, ayrıcılardan, izolyatorlardan, generator avadanlıqlarından da yan keçməmişdir.

Digər enerji obyektlərində olduğu kimi, burada da yanğın təhlükəsizliyi məsələsi daima diqqət mərkəzində saxlanılır. Stansiyanın və maşın zalının ətrafı yağ məhsullarından,  ərazi isə quru otlardan və yanğın törədə biləcək tullantılardan təmizlənmişdir

Xatırladaq ki, effektivliyi yüksək olmaqla yanaşı tikinti müddətinin də azlığını nəzərə alaraq postsovet məkanında ilk dəfə olaraq generasiya güclərinin paylanmış struktur konsepsiyasını əsas götürərək porşen tipli mühərriklərdən ibarət olan generatorların tətbiqinə başlanmışdır. Belə generasiya güclərindən biri də 12 aqreqatdan ibarət, ümumi gücü  105 MVt olan “Bakı Elektrik Stansiyası”dır.