Tərtər Elektrik Şəbəkəsindən (EŞ) “Azərenerji” ASC-nin Mətbuat xidmətinə daxil olan məlumata görə, müəssisənin xidməti ərazisində istehlakçıların daha da keyfiyyətli və dayanıqlı elektik enerjisi ilə təmin olunmasına xüsusi diqqət yetirilir. Bu məqsədlə elektrik avadanlıqları və hava elektrik verilişi xətləri vaxtlı-vaxtında təmir olunur, saz vəziyyətə gətirilir.

Mənbəyə istinadən qeyd edək ki, cari ilin son üç ayı ərzində havaların qeyri sabit keçməsi ilə əlaqədar olaraq müəssisənin balans mənsubiyyətinə aid olan 10 kV-lik xətlərin 32,5 km-də müxtəlif təyinatlı təmir işləri həyata keçirilmiş, 1,7 km-ə yaxın naqil və 45-dən artıq dayaq yenisi ilə əvəzlənmişdir. Eyni zamanda 7 travers də quraşdırılmışdır.

Qeyd edək ki, sözügedən dövrdə 0,4 kV-lik xətlərin 9,8 km-i təmir edilmiş, 350 metr naqil və 10-dan artıq dayaq dəyişdirilmiş, 400 metrdən artıq SİP kabel xətti çəkilmişdir. Bütün bunlarla yanaşı xətlərin qabariti də bərpa edilmişdir. Yeri gəlmişkən, təmir işləri müəssisənin xidməti ərazisində olan TM-lərdən də yan ötməmişdir. Belə ki, sözügedən ərəfədə 16 TM-də müxtəlif təyinatlı təmir işləri həyata keçirilmiş və üç transformatorda əsaslı təmir edilərək təkrar şəbəkəyə qoşulmuşdur.

Mənbə onu da bildirdi ki, cari ilin iyul ayında müəssisənin xidməti ərazisində keçirilmiş reydlər zamanı 160-a yaxın istehlakçının (bunun 135-i məişət abonenti (əhali) istehlakçılar qrupuna aiddir) elektrik enerjisindən istifadə qaydalarını pozması faktı aşkar edilmişdir. Aşkar edilmiş qayda pozuntuları üzrə tərtib edilmiş aktlara əsasən müvafiq qaydada hesabatlar aparılaraq 571,8 min  kilovatsaatdan artıq (bunun 500,2 min kilovatsaata yaxını məişət abonenti (əhali) istehlakçılar qrupuna aiddir) itirilmiş elektrik enerjisinin istehlak dəyəri bərpa edilmişdir.

Onu da qeyd edək ki, cari ilin 7 ayı ərzində aşkar edilmiş qayda pozuntularına görə 570 akt (bunun 500-ə yaxını məişət abonenti (əhali) istehlakçılar qrupuna aiddir) tərtib olunmuş, 3 milyon 448,2 min kilovatsaata yaxın (bunun 1 milyon 974,6 min kilovatsaatdan çoxu məişət abonenti (əhali) istehlakçılar qrupuna aiddir) itirilmiş elektrik enerjisinin 206,9 min manata yaxın istehlak dəyəri bərpa edilmişdir. Həmin bu məbləğin 79 faizə yaxın hissəsinin ödənişi təmin edilmiş və qalan hissənin ödənilməsi istiqamətində müvafiq tədbirlər həyata keçirilir.

Onu da qeyd etmək yerinə düşər ki, müəssisə üzrə cari ilin iyul ayında ümumilikdə 11,3 milyon kilovatsaata yaxın elektrik enerjisi istehlak edilmişdir ki, bu da ötən ilin eyni dövründəki istehlakdan 1,6 milyon kilovatsaata yaxın çoxdur. Ödəniş isə ötən ilin eyni dövründəki göstəricidən mütləq 4 faizə yaxın çoxdur. O cümlədən, daimi əhali istehlakçı qrupunda 1,9 milyon kilovatsaatdan artıq elektrik enerjisi istehlak edilmişdir. Ötən ilin müvafiq dövrü ilə müqayisədə istehlak 702 min kilovatsaata yaxın azalmış, ödənişdə mütləq artım isə 9 faizə yaxın olmuşdur.

Sonda onu da qeyd edək ki, müəssisə üzrə cari ilin 7 ayı ərzində ümumi istehlak ötən ilin müvafiq dövrü ilə müqayisədə 3,4 milyon kilovatsaatdan çox artaraq 65,3 milyon kilovatsaata yaxın olmuşdur. Ödənişdə mütləq artım isə 3 faizə yaxındır. O cümlədən, daimi əhali istehlakçı qrupunda istehlak 15,1 milyon kilovatsaatdan artıq olmuşdur. Nətəcədə ötən ilin müvafiq dövrü ilə müqayisədə istehlak 1 milyon kilovatsaat azalmış, ödənişdə mütləq artım 9 faizdən artıq olmuşdur.