Bakı Elektrik Stansiyası istismara verildiyi vaxtdan indiyədək (01.07.2013-cü ilə kimi) 3,5 milyard kilovat-saat elektrik enerjisi istehsal edib. Cari ilin birinci yarımili ərzində bu göstərici 270 milyon kVt-saatdan artıq olub.

Müəssisədən “Azərenerji” ASC-nin Mətbuat xidmətinə daxil olan məlumatda bildirilir ki, 2013-2014-cü il payız-qış möv­sümünə hazırlıq tədbirləri ardıcıllıqla yerinə yetirilir. Aqreqatlara zəruri texniki xidmət göstərilib, kimyəvi analizlər aparılıb, radiatorlar yuyulub. 110 kV-lik yarımstansiyada transformatorlar cari təftiş olunub, generatorun hava filtirləri yenisi ilə əvəzlənib, işəsalıcı hava kompressorları təmir edilib.  Yanğınsöndürücü su xətti təftiş olunub, avtomatika, rele mühafizə qurğuları və ölçü cihazları yoxlanılıb, sazlanıb, qaz xəttində filtrlər dəyişdirilib, qaztənzimləyici bloklar təftiş edilib.

Mənbəyə istinadən qeyd edək ki, ötən altı ay ərzində elektrik sexinin işçi heyəti tərəfindən elektrik avadanlıqlarına texniki baxışlar keçirilib, aqreqatlarda qrafik üzrə texniki xidmət işləri aparılıb, 110 kV-lik yarımstansiya avadanlıqlarında təmir işləri görülüb.

Yüksək gərginlikli yarımstansiyadakı güc transformatorlarında, eleqaz açarlarında, ayrıcılarda texniki xidmət işləri aparılıb. Doqquz  generator təmir edilmişdir.

Onu da qeyd edək ki, cari ilin 6 ayı ərzində yanğın təhlükəsizliyi tədbirləri hazırlanıb və həyata keçirilməsi davam etdirilir. Yanğın su nasosları təmir edilib, hazırda işçi vəziyyətinə gətirilib. Stansiya ərazisində yanğın şlanqları və başlıqları təftiş olunub.Yanğın postları yanğın söndürmə vasitələri ilə təmin edilib. Köpüklü yanğınsöndürənlər işçi vəziyyətə gətirilib. 110 kV-lik yarımstansiya yanğın postları və yanğınsöndürənlərlə təmin edilib.

Stansiyanın ərazisi və maşın zalının ətrafında  yanğın  mənbəyi olan  yağ məhsulları,  otlar  daim təmizlənir.  İş yerlərində təhlükəsizlik qaydalarına daim  nəzarət edilir.