Respublikamızın şimal bölgəsinin elektrik enerjisinə olan tələbatının lazımi səviyyədə təmin olunmasında “Xaçmaz Regional Elektrik Şəbəkəsi”nin (REŞ) tabeliyində olan elektrik şəbəkələrinin özünəməxsus yeri və rolu var.

REŞ-dən “Azərenerji” ASC-nin Mətbuat xidmətinə daxil olan məlumata görə, adıçəkilən enerji obyektinin tərkibinə daxil olan bütün şəbəkələrdə istismar səviyyəsinin daha da yüksəldilməsi üçün təxirəsalınmaz tədbirlər həyata keçirilmiş və hazırda da davam etdirilir. Belə ki, cari ilin son üç ayı ərzində 110 kV-lik “Quba” yarımstansiyasında güc artımı ilə əlaqədar 2 saylı 25 MVA transformator 40 MVA-lıqla əvəzlənmişdir. Eyni zamanda bu transformatorun 110 kV-lik eleqaz açarı, xətt ayrıcısı, giriş yağ açarları, həmçinin 1 saylı 40 MVA trasformator və onun 35, 10 kV-lik avadanlıqları, hər iki bölmədə xüsusi sərfiyyat transformatorları, 110 kV-lik I-II “Quba” HEVX-nin xətt ayrıcıları da təmir edilmişdir.

Yeri gəlmişkən, sözügedən dövrdə 35 kV-lik “Fındığan” yarımstansiyasında da güc artımı ilə əlaqədar 1,8 MVA transformator 2,5 MVA-lıqla əvəzlənmişdir. Eyni zamanda 330 kV-lik “Xaçmaz” yarımstansiyasında gücü 180 MVA olan iki transformatorda sınaq ölçü işləri aparılmış, transformatorun yük altında gərginlik çeviricisi yoxlanmış, 110 kV-lik gərginlik və cərəyan transformatorlarında ölçü və sınaq işləri aparılmışdır. Bütün bunlarla yanaşı 110 kV-lik “Qusar” yarımstansiyasında da müxtəlif təyinatlı təmir işləri reallaşdırılmış və burada yeni tikilən 10 kV-lik qapalı paylayıcı quruluşda da tikinti işləri davam etdirilmişdir.

Qeyd edək ki, 110 kilovoltluq “Şabran”, “Siyəzən”, “Broyler”, 35 kV-lik “Quba”, “Kanal”, “Nabran”, “Qusar”, “Zeyxur SES”, “Zeyvə” yarımstansiyalarında da müvafiq təmir işləri həyata keçirilərək onların dayanıqlığı daha da möhkəmləndirilmişdir.

Mənbə onu da bildirdi ki, hesabat dövründə yenidənqurma və təmir işləri müəssisənin balans mənsubiyyətinə aid olan HEVX-lərindən də yan ötməmişdir. Belə ki, yeni 110 kV-lik  II “Ləzə” HEVX istismara verilmişdir. Eyni zamanda 330 kV-lik “Xaçmaz”, “Dərbənd”, 110 kV-lik “Xamaz”, “Xudat-Yalama” və digər bir neçə xəttdə müxtəlif təyinatlı təmir işləri həyata keçirilmişdir. Ümumiyyətlə, sözügedən dövrdə 35 kV-lik və ondan yuxarı gərginlikli HEVX-nin 96 km-ə yaxın hissəsində təmir və bərpa işləri aparılmışdır.

Onu da qeyd etmək yerinə düşərdi ki, şəbəkənin balansında olan 110 və 35 kV-lik hissə üzrə də bir sıra layihələrin həyata keçirilməsi planlaşdırılır. Belə ki, məlum olduğu kimi, isti yay günlərində bu bölgəyə güclü turist axını müşahidə olunur. Bu da bölgədə iri enerjitutumlu obyektlərin qurulması zərurətini ortaya qoyur. Onların normal elektrik enerjisi ilə təchiz edilməsi üçün Qəçreş və Təngə-altı kəndi ərazisində yeni 35 kV-lik yarımstansiyaların tikintisinın başa çatdırılması, 110 kV-lik “Nabran” yarımstansiyasının tikinti işlərinin başlanması nəzərdə tutulur.

Sonda onu da qeyd edək ki, müəssisə üzrə əməyin mühafizəsi və texniki təhlükəsizlik qaydalarına da ciddi əməl olunur. Xidməti ərazinin fərqli iqlimə və relyefə malik olması istismar heyəti üçün müəyyən çətinlilkər yaradır. Bunu nəzərə alaraq, istənilən əməliyyatın həyata keçirilməsindən  qabaq texniki heyət təlimatlandırılır və işçilər lazımi mühafizə dəstləri ilə təmin olunurlar.