“Gədəbəy Elektrik Şəbəkəsi”ndən (EŞ) “Azərenerji” ASC-nin Mətbuat xidmətinə daxil olan məlumata görə, cari ilin son üç ayında burada müvafiq  təmir-bərpa işləri aparılmışdır. Müvafiq hava elektrik verilişi xətləri və onların avadanlıqları cari və əsaslı təmir edilərək növbəti mövsümə hazır vəziyyətinə gətirilib. Belə ki, burada sözügedən dövr ərzində EVX-lərin 30,2 kilometrə yaxın hissəsi təmir olunmuş, 135-ə yaxın dayaq yenisi ilə əvəzlənmişdir. Qeyd edək ki, təmir işləri TM və KTM- lərdən də yan keçməmişdir. Belə ki, həmin bu dövrdə bir TM quraşdırılaraq istismara verilmiş, 40-dan çoxunda müxtəlif təyinatlı təmir işləri həyata keçirilmiş, eyni zamnda ümumi gücü 7,8 MVA olan 41 transformator da  təmir edilmişdir.

Onu da qeyd etmək yerinə düşərdi ki, rayonun enerji təchizatının daha da dayanıqlı təmin edilməsi istiqamətində görülən işlər davam etdirilir. Hazırki iqlim şəraitini nəzərə alaraq, yanğın təhlükəsizliyinin təmin edilməsi məqsədilə TM və KTM-lərin ərazisi quru otlardan təmizlənmiş, yanğınsöndürmə postları yoxlanılmış və komplektləşdirilmişdir. Eyni zamanda yağ tutumlu avadanlıqların alt hissəsindəki yağ çınqıllar yeni təmiz çınqıllarla əvəz edilmişdir.

“Həyata keçirilən təmir-bərpa işləri nəinki istismar səviyyəsinin daha da yüksəldilməsinə, eyni zamanda enerji haqlarının ödənilməsində və elektrik enerjisindən qeyri qanuni istifadə hallarının qarşısının alınmasında da mühüm rol oynayır”, – deyən mənbə cari ilin 5 ayı ərzində, o cümlədən may ayında sayğac sxeminə müdaxilələrin qarşısının alınması istiqamətində görülmüş tədbirlərdən də danışdı.

Mənbəyə istinadən qeyd edək ki, 2013-cü ilin 5 ayı ərzində müəssisənin xidməti ərazisində keçirilmiş reydlər zamanı 140-dan artıq istehlakçının elektrik enerjisindən istifadə qaydalarını pozması faktı aşkar edilmişdir. Aşkar edilmiş qayda pozuntuları müvafiq qaydada aktlaşdırılmış və 569 min  kilovatsaatdan artıq itirilmiş elektrik enerjisinin 34,1 min manatdan çox istehlak dəyəri bərpa edilmişdir. Həyata keçirilən müvafiq tədbirlər nəticəsində həmin bu məbləğin 50 faizdən çoxunun ödənişi təmin olunmuş, qalan məbləğin ödənilməsi istiqamətində müvafiq tədbirlər həyata keçirilir.  O cümlədən, cari ilin may ayında isə 28 istehlakçının sayğac üçot komplektində pozuntu faktı aşkar edilərək akt tərtib olunmuşdur. Nəticədə 99,9 min kilovatsaatdan artıq itirilmiş elektrik enerjisinin 6 min manata yaxın istehlak dəyəri bərpa edilmişdir.

Mənbə onu da qeyd etdi ki, cari ilin may ayında müəssisənin xidmət ərazisində 3 milyon kilovatsaata yaxın elektrik enerjisi istehlak edilmişdir ki, bu da ötən ilin müvafiq dövründəki istehlakdan 71 min kilovatsaat azdır. O cümlədən, daimi əhali istehlakçı qrupu üzrə istehlak ötən ilin müvafiq dövrü ilə müqayisədə 30 min kilovatsaatdan çox artaraq 2,3 milyon kilovatsaatdan artıq olmuşdur. Ödənişdə mütləq artım isə 3 faizə yaxın olmuşdur.

Mənbədən əldə etdiyimiz digər bir məlumat görə, cari ilin 5 ayı ərzində isə burada 14,1 milyon  kilovatsaata yaxın elektrik enerjisi istehlak edilib. Nəticədə ötən ilin müvafiq dövrü ilə müqayisədə istehlak 1,3 milyon kilovatsaata yaxın azalmışdır. O cümlədən, daimi əhali istehlakçı qrupu üzrə istehlak ötən ilin müvafiq dövrü ilə müqayisədə 1,3 milyon kilovatsaata yaxın azalaraq 10,6 milyon kilovatsaatdan artıq olmuşdur.

Mənbədən daxil olan son məlumata görə, fövqəladə hallar nəzərə alınmazsa, müəssisələrin avadanlıqları texniki göstəriciləri  baxımından  iqlim şəraitinə tam hazırdır.