“Ağcabədi Elektrik Şəbəkəsi”ndən (EŞ) “Azərenerji” ASC-nin Mətbuat xidmətinə daxil olan məlumata görə, istehlakçılara göstərilən xidmətin keyfiyyətinin daha da yüksəldilməsi məqsədilə həyata keçirilən yenidənqurma və təmir-tikinti işləri cari ilin son üç ayında da uğurla həyata keçirilmişdir. Belə ki, müəssisənin balans mənsubiyyətinə aid olan 10 kV-lik “Təzəkənd”, “Nizami”, I-II “Şəhər”, “Rəncbərlər” və digər EVX-lərdə (ümumilikdə 20 ədəd 10 kV-lik xətt) müxtəlif təyinatlı təmir işləri həyata keçirilmiş, o cümlədən 5,3 kilometr xətt təmir edilmişdir. Eyni zamanda sözügedən dövrdə 0,4 kV-lik xətlərin isə 3,5 kilometrdən artıq hissəsində təmir işləri aparılmışdır. Qeyd edək ki, təmir işləri TM və KTM-lərdən də yan ötməmişdir. Belə ki, sözügedən dövr ərzində balans mənsubiyyətinə aid olan 45 müxtəlif güclü transformator da təmir edilərək təkrar şəbəkəyə qoşulmuşdur.

Hazırda isə mövsümə hazırlıq çərçivəsində həm yarımstansiyalarda, həm transformator və komplekt transformator məntəqələrində, həm də xətlərdə cari və əsaslı təmir işləri davam etdirilir.

“İtkilərin azaldılması qarşıda duran ən mühüm vəzifələrdən biridir. Bu istiqamətdə müntəzəm olaraq müvafiq tədbirlər davam etdirilir”, – deyən mənbə onu da bildirdi ki, cari ilin may ayında müəssisənin xidməti ərazisində keçirilmiş reydlər zamanı 104 istehlakçının elektrik enerjisindən istifadə qaydalarını pozması faktı aşkar edilmişdir. Aşkar edilmiş qayda pozuntuları müvafiq qaydada aktlaşdırılmış və 1 milyon 124 min  kilovatsaata yaxın itirilmiş elektrik enerjisinin 67,4 min manatdan artıq istehlak dəyəri bərpa edilmişdir.

Mənbəyə istinadən onu da qeyd edək ki, cari ilin 5 ayı ərzində isə burada 250-ə yaxın qayda pozuntusu aşkar edilərək akt tərtib olunmuşdur. Aktlar üzrə müvafiq qaydada hesabat aparılaraq 2 milyon 642,1 min kilovatsaatdan artıq itirilmiş elektrik enerjisinin 75,7 min manata yaxın istehlak dəyəri bərpa edilmişdir. Həyata keçirilən müvafiq tədbirlər nəticəsində həmin bu məbləğin 64 faizdən artıq hissəsinin ödənişi təmin edilmiş və qalan hissənin ödənilməsi istiqamətində isə müvafiq tədbirlər həyata keçirilir.

Mənbə onu da bildirdi ki, müəssisə üzrə  cari ilin may ayında 23,6 milyon kilovatsaatdan artıq elektrik enerjisi istehlak edilmişdir ki, bu da ötən ilin eyni dövründəki istehlakdan 658,5 min kilovatsaat çoxdur. Ötən  ilin müvafiq dövrü ilə müqayisədə ödənişdə mütləq artım 2 faizə yaxın olmuşdur. O cümlədən, daimi əhali istehlakçı qrupu üzrə isə 3 milyon kilovatsaatdan artıq elektrik enerjisi istehlak edilmişdir ki, bu da ötən ilin müvafiq dövründəki göstəricidən 239 min kilovatsaat çoxdur. Ödəniş isə ötən  ilin müvafiq dövrü ilə müqayisədə mütləq 6 faizə yaxın çoxdur.

Onu da qeyd etmək yerinə düşərdi ki, cari ilin 5 ayı ərzində isə 118,9 milyon kilovatsaata yaxın  elektrik enerjisi istehlak edilmişdir. Nəticədə ötən ilin müvafiq dövrü ilə müqayisədə istehlak 636 min kilovatsaat artmış, ödənişdə mütləq artım isə 12 faizdən çox olmuşdur. O cümlədən, daimi əhali istehlakçı qrupunda istehlak 17,1 milyon kilovatsaata yaxın olmuşdur ki, bu da ötən ilin müvafiq dövründəki istehlakdan 1,1 milyon kilovatsaat azdır. Yeri gəlmişkən, mövcud iqlim şəraiti ilə bağlı  yanğın təhlükəsizliyi məsələsi daima diqqət mərkəzində saxlanılır. TM və KTM-lərin ərazisi quru otlardan təmizlənmiş və yağ tutumlu avadanlıqların alt hissəsindəki yağ çınqıllar yeni təmiz çınqıllarla əvəz edilmiş,  ərazi quru otlardan və yanğın törədə biləcək tullantılardan təmizlənmişdir

Sonda onu da bildirək ki, növbəti mövsümün uğurla başa çatdırılması istiqamətində enerji təchizatçıları öhdələrinə düşən vəzifələri layiqincə yerinə yetirməyə çalışırlar.