Ötürücü və paylayıcı şəbəkələrdə işlər böyük vüsət alır. Avadanlıqların ifrat yüklənmədən və havanın yüksək temperaturunun təsirindən qorunması üçün zəruri tədbirlər həyata keçirilir. “Saatlı Elektrik Şəbəkəsi”ndən (EŞ) “Azərenerji” ASC-nin Mətbuat xıdmətinə bu enerji təsərrüfatının mövcud vəziyyəti barədə daxil olan məlumatda belə qeyd edilir.

Mənbənin bildirdiyinə görə, cari ilin son üç ayı ərzində EŞ-in xidməti ərazisindəki 10 kV-lik “Nərimanov”, “Dartı”, I-II “Şəhər”, “Nəsimikənd”, “Mircəlalkənd”, 6 kV-lik “Seyidoba”, “Sabir” və digər hava xətlərində (HX) aparılmış təmir işləri çərçivəsində ümumilikdə 4,5 kilometrə yaxın hissə təmir edilmişdir. Eyni zamanda balans mənsubiyyətinə aid olan 0,4 kV-lik xətlərin isə 6 kilometrdən artıq hissəsi təmir edilmişdir. Analoji tədbirlər rayonun “Qaralar”, “Xanlarkənd”, “Fətəlikənd”, “Saatlı” və digər xətlərində həyata keçirilmişdir.

Qeyd edək ki, paylayıcı şəbəkənin dayanıqlığının daha da möhkəmləndirilməsi məqsədilə transformator məntəqələrində də müxtəlif təyinatlı təmir işləri aparılmış və sözügedən dövrdə balans mənsubiyyətinə aid olan müxtəlif güclü 30-dan artıq transformator da təmir edilərək istehlakçıların istifadəsinə verilmişdir.

Mənbədən daxil olan məlumata istinadən qeyd edək ki, təsdiq edilmiş plan-qrafikdə nəzərdə tutulmuş və istismar zamanı mövcud olan digər təmir-bərpa işlərinin müvəffəqiyyətlə həyata keçirilməsi istiqamətində hazırda tədbirlər davam etdirilir.

Burada cari ilin may ayında keçirilmiş reydlər zamanı 87 istehlakçının sayğac uçot komplektində qüsur aşkar edilərək 285,7 min kilovatsaatdan artıq itirilmiş elektrik enerjisinin 17,1 min manatdan çox istehlak dəyəri bərpa edilmişdir.

Mənbəyə istinadən onu da qeyd edək ki, 2013-cü ilin 5 ayı ərzində keçirilmiş reydlər zamanı 310-dan artıq qayda pozuntusu faktı aşkar edilərək 1 milyon 261 min kilovatsaatdan çox itirilmiş elektrik enerjisinin 75,7 min manata yaxın istehlak dəyəri bərpa edilmişdir. Həyata keçirilən müvafiq tədbirlər nəticəsində həmin bu məbləğin 20 faizdən artıq hissəsinin ödənişi təmin edilmiş və qalan hissənin ödənilməsi istiqamətində isə müvafiq tədbirlər həyata keçirilir.

Yeri gəlmişkən, mənbədən qayda pozuntularının təsnifatı və istehlakçı qrupu barədə əldə etdiyimiz məlumata istinadən onu da bildirək ki,  elektrik enerjisindən yenə də kənar xətt vasitəsilə istifadə edilməsi halı üstünlük təşkil etmiş və ən çox qayda pozuntusu  məişət abonenti (əhali) istehlakçı qrupunda aşkar edilmişdir.

Onu da qeyd edək ki, müəssisə üzrə cari ilin may ayında ümumilikdə 5,6 milyon kilovatsaata yaxın elektrik enerjisi istehlak edilmişdir ki, bu da ötən ilin eyni dövründəki istehlakdan 1,3 milyon kilovatsaata yaxın çoxdur. Hesabat dövründə ümumi ödəniş ötən ilin müvafiq dövründəki göstərici ilə müqayisədə mütləq 12 faizə yaxın artmışdır. O cümlədən, daimi əhali istehlakçı qrupunda isə 3,8 milyon kilovatsaata yaxın elektrik enerjisi istehlak edilmişdir. Ötən ilin müvafiq dövrü ilə müqayisədə istehlak 1,1 milyon kilovatsaatdan çox artmış, ödənişdə mütləq artım 16 faizdən artıq olmuşdur.

Yeri gəlmişkən, cari ilin 5 ayı ərzində isə ümumi istehlak ötən ilin müvafiq dövrü ilə müqayisədə 8,9 milyon kilovatsaatdan çox artaraq 44 milyon kilovatsaata yaxın olmuşdur. Ödənişdə mütləq artım da qeydə alınmışdır. O cümlədən, daimi əhali istehlakçı qrupunda isə istehlak 24,8 milyon kilovatsaatdan artıq olmuşdur. Nətəcədə ötən ilin müvafiq dövrü ilə müqayisədə istehlak 9,6 milyon kilovatsaatdan çox artmış, ödənişdə mütləq artım isə 1,4 faiz olmuşdur.