Respublika enerji sisteminin bütün sahələrində olduğu kimi, ən müasir texnologiyaların tətbiqi ilə tikilərək istifadəyə verilmiş “Astara” elektrik stansiyasında (ES) da aqreqatlara növbəti, istismar həddinə uyğun bütün texniki xidmətlər vaxtında göstərilmişdir. Hal-hazırda aqreqatlar dispetçer qrafikinə uyğun olaraq fəaliyyət göstərir.

Stansiya işə başladığı gündən  qrafikə uyğun olaraq normal iş şəraitində fəaliyyət göstərir və bu günə kimi (01.06.2013-cü ilə kimi) 2 milyard 366 milyon kilovatsaat elektrik enerjisi istehsal edilmişdir.    Elektrik stansiyasından  “Azərenerji” ASC-nin Mətbuat xidmətinə daxil olan məlumata görə, qışın sınaqlarından üzü ağ çıxan kollektiv cari ilin may ayında 21,3 milyon kilovatsaat elektrik enerjisi istehsal etmişdir. Qeyd edək ki, müəssisə cari ilin 5 ayı ərzində də dispetçer qrafikinə uyğun olaraq Cənub bölgəsinin fasiləsiz elektrik enerji ilə təminatında mühüm rol oynamışdır. Belə ki, sözügedən dövr ərzində burada 116,8 milyon kilovatsaat elektrik enerjisi istehsal edilmişdir.

Onu da qeyd etmək yerinə düşərdi ki, avadanlıqların iş səmərəliliyinin artırılması, enerjinin ötürülməsi və paylaşdırılması sistemlərinin dayanıqlı, sabit işləməsinin və istismar səviyyəsinin  yüksəldilməsi istiqamətində həyata keçirilmiş məqsədyönlü tədbirlər nəticəsində elektrik enerji istehsalının digər texniki göstəricilərində də yüksək nəticələr əldə edilmişdir.

Mənbə onu da bildirdi ki, son üç ay ərzində növbəti istismar həddinə uyğun olaraq 6 aqreqatda texniki qulluq işləri yerinə yetirilmiş və dörd aqreqatda tüstü borularında müxtəlif təyinatlı təmir işləri həyata keçirilmişdir. Eyni zamanda yaz-yay daşqın sularından mühafizə məqsədilə stansiya ərazisində müvafiq tədbirlər həyata keçirilir, o cümlədən kollektor-drenaj şəbəkəsinin inşası ilə bağlı layihə-smeta sənədləri hazırlanmışdır.

Mənbədən əldə etdiyimiz digər bir məlumatda o da bildirilir ki, tələbatçılara keyfiyyətli və dayanıqlı elektrik enerjisinin ötürülməsində stansiya kollektivi səylə çalışır, aqreqatlarda aparılan texniki xidmət işlərində də fəal iştirak edirlər.

Sonda onu da qeyd edək ki, burada yay mövsümünə hazırlıqla əlaqədar olaraq yanğına qarşı təhlükəsizlik tədbirləri gücləndirilmişdir. Bu məqsədlə ilkin yanğınsöndürmə vasitələrinə baxış keçirilmiş, aşkar edilmiş nasazlıqlar aradan qaldırılmışdır. Yeni alınmış köpük generatoru istifadəyə hazır vəziyyətə gətirilmişdir. Ümumiyyətlə, müntəzəm olaraq yanğın təhlükəli obyektlərə baxış keçirilir və aşkar edilən ən xırda nasazlıqlar aradan qaldırılır.

Xatırladaq ki, Dövlət Proqramına uyğun olaraq bölgənin elektrik enerjisi təminatının yaxşılaşdırılması məqsədilə istismara verilmiş bu elektrik stansiyası 10 aqreqatdan ibarət olub, ümumi gücü  87 MVt təşkil edir.