Digər enerji obyektlərində olduğu kimi “Abşeron Regional Elektrik Şəbəkəsi”nin (REŞ) balans mənsubiyyətinə aid olan yarımstansiyalarda da təmir işləri təsdiq edilmiş qrafik üzrə keyfiyyətlə yerinə yetirilmişdir. Hazırda təmir-bərpa və yenidənqurma işləri davam etdirilir.

Sözügedən müəssisədən “Azərenerji” ASC-nin Mətbuat xidmətinə cari ilin son 3 ayı ərzində  həyata keçirilmiş tədbirlər barədə məlumatda bildirilir ki, şəbəkənin xidməti ərazilərindəki bir sıra enerji obyektlərində sistem əhəmiyyətli yenidənqurma və təmir bərpa işləri həyata keçirilmişdir.

Belə ki, 500 kV-lik “Abşeron” yarımstansiyasında layihə əsasında 220 kV-lik açıq paylayıcı quruluşda (APQ) yenidənqurma işləri davam etdirilir. O cümlədən, sözügedən APQ-də 220 kV-lik “Böyük Şor” yarımstansiyası ilə əlaqələndirilməsi üçün yuvanın quraşdırılması başa çatdırılmışdır.

Qeyd edək ki, şəhərin mərkəzi hissəsinin enerji təchizatını həyata keçirən 220 kV-lik “Müşviq” yarımstansiyasının İdarəetmə məntəqəsində 110/220 kV-lik idarəetmə lövhələrinin yenisi ilə əvəzlənməsi işləri davam etdirilir. Eyni zamanda bu yarımstansiya ilə “Səngəçal” ES-in əlaqələndirilməsi üçün 110 kV-lik iki yuvanın da  quraşdırılması başa çatdırılmışdır.

Onu da qeyd edək ki, 220 kV-lik “Səngəçal” yarımstansiyasında layihə əsasında 220 kV-lik tərəfdə 5-ci bölmənin tikintisi başa çatdırılmışdır. Hazırda burada 125 MVA-lıq avtotransformatorun 200 MVA-lıqla əvəz olunması işləri başa çarmaq üzrədir.

Mənbədən daxil olan məlumatda o da qeyd edilir ki, 220 kilovoltluq “Xırdalan” yarımstansiyası da bu qəbildən olan enerji təsərrüfatlarındandır. Belə ki, yarımstansiyanın dayanıqlılığının daha da möhkəmləndirilməsi ilə əlaqədar olaraq 3 saylı avtotransformatorun 10 kV-lik çıxış HX-nin kabel xəttinə keçilməsi işinə başlanmışdır. Həmçinin burada 10 kV-lik qapalı paylayıcı quruluşun tikintisi də nəzərdə tutulmuşdur.

Onu da qeyd etmək yerinə düşərdi ki, 220 kilovoltluq “Hövsan”, “8 km”, “Şığ”, 110 kilovoltluq “205”, “Zabrat” yarımstansiyalarında bu tədbirlər həyata keçirilir. Adları qeyd edilən enerji obyektlərində müxtəlif təyinatlı yenidənqurma işləri həyata keçirilib. Məsələn, burada  müxtəlif gərginlikli bölmələr arasında əlaqələndirici kabellərin  yenisi ilə əvəzlənməsi, gərginlik və cərəyan transformatorlarının dəyişdirilməsi və digər müxtəlif təyinatlı təmir işləri uğurla yerinə yetirilmişdir. Mənbənin verdiyi məlumata əsasən sadalanan tədbirlərin yerinə yetirilməsi, enerji təsərrüfatlarının daha da dayanıqlı fəaliyyətinə zəmanət verən əsas amillərdəndir. Bunu nəzərə alaraq şəbəkədən yenidənqurma işlərinin davam etdirilməsinin gündəlikdə duran əsas tapşırıqlardan biri olduğu bildirildi.