Ölkəmizdə ardıcıl və sistemli şəkildə atılan bütün addımlar iqtisadiyyatın digər sahələri kimi elektrik enerji sisteminin də davamlı və tarazlı inkişafına müsbət təsir göstərmişdir.  Belə ki, elektrik enerji sisteminin davamlı və tarazlı inkişafına yönəldilmiş bir sıra mühüm dövlət proqramları respublikanın ikinci sənaye şəhəri olan Sumqayıtda da uğurla həyata keçirilir. O cümlədən, ümumi gücü 525 MVt olan “Sumqayıt” elektrik stansiyası iqtisadi cəhətdən inkişaf edən Sumqayıt şəhərinin və Abşeron yarımadasının enerji təhlükəsizliyinin möhkəmləndirilməsini təmin etmişdir. Bundan əlavə enerjinin ötürülməsi və paylaşdırılması sistemlərinin dayanıqlı və sabit işləməsinin təmin edilməsində böyük rolu var.

Sözügedən müəssisədən “Azərenerji” ASC-nin Mətbuat xidmətinə daxil olan məlumata görə, stansiya ötən dövrlərdə olduğu kimi, cari ilin 4 ayı ərzində də dispetçer qrafikinə uyğun olaraq fəaliyyət göstərmiş və burada 1 milyard 3,1 milyon kilovatsaata yaxın elektrik enerjisi istehsal edilmişdir.

Qeyd edək ki, cari ilin aprel ayında isə 210,6 milyon kilovatsaata yaxın elektrik enerjisi istehsal edilmişdir.

Avadanlıqların iş səmərəliliyinin artırılması, enerjinin ötürülməsi və paylaşdırılması sistemlərinin dayanıqlı, sabit işləməsinin və istismar səviyyəsinin  yüksəldilməsi istiqamətində həyata keçirilmiş məqsədyönlü tədbirlər nəticəsində elektrik enerji istehsalının digər texniki-istehsalat göstəriciləri üzrə də yüksək nəticələr əldə edilmişdir.

Təmir işləri barəsində əldə etdiyimiz məlumata istinadən qeyd edək ki, cari ilin son 3 ayı ərzində sahil nasosxanasında modifikasiya işləri aparılmışdır. Eyni zamanda “Yaşma” HX üçün yuvanın tikintisi başa çatdırılmış və hazırda ərazinin genişləndirilməsi işləri davam etdirilir. Bütün bunlarla yanaşı stansiyanın optimal iş rejimini saxlamaq üçün avadanlıqlara texniki xidmət göstərilmişdir.

Onu da qeyd etymək yerinə düşərdi ki, digər enerji obyektlərində olduğu kimi, burada da yanğın təhlükəsizliyi məsələsi daima diqqət mərkəzində saxlanılır. Sexlər, inzibati bina və yardımçı binalar yanğınsöndürmə avadanlıqları ilə təmin olunmuş, ərazi quru otlardan və yanğın törədə biləcək tullantılardan təmizlənmişdir.

Xatırladaq ki, bu stansiyada hər birinin gücü 164 meqavat olan iki ədəd qaz turbini və gücü 189 meqavat olan bir ədəd buxar turbini quraşdırılmışdır.