İstismar səviyyəsinin yaxşılaşdırılması məqsədilə “Saatlı Elektrik Şəbəkəsi”ndə əhəmiyyətli işlər görülməkdədir. Şəbəkədən “Azərenerji” ASC-nin Mətbuat xidmətinə daxil olan məlumata görə, son vaxtlar təxminən, 220 ədəd yeni dayaq basdırılıb, 8 kilometr uzunluğunda 10 kilovoltluq xətt çəkilib.

Qeyd edək ki, yarımstansiyalarda da zəruri işlər görülür. 110/35/10 kilovoltluq “Dartı” yarımstansiyasında 20 MVA gücündə transformator əsaslı təmir olunub. Hazırda isə həmin yarımstansiyadakı 16 MVA-lıq transformatorun 110 kilovoltluq tərəfində eleqaz açarlarının quraşdırılması davam etdirilir.

Mənbə onu da bildirdi ki, rayonda şəbəkələrin yenidən qurulması ardıcıllıqla davam etdirilirvə 209 km uzunluğunda SİP-kabelin çəkilməsi və 6500 ədəddən çox smart-kart tipli sayğacın quraşdırılması təmin edilib. Təxminən 57 kilometr uzunluğunda elektrik verilişi xətti yenidən qurulub, 8 yeni transformator məntəqəsi quraşdırılıb. Hazırda 332 abonenti olan Azadakənd ərazisindəki şəbəkə yenidən qurulur.

Yeri gəlmişkən, 35/10 kV-lik “Saatlı” yarımstansiyasında 1 saylı 10 MVA transformatorun əsaslı təmiri də yaxın günlərin planına daxildir.