TEXNİKİ İTKİLƏR AZALDILIR
Respublikamızın şimal bölgəsinin iqtisadiyyatında Şabran rayonunun özünəməxsus yeri və rolu var. Bu mənada, rayonun elektrik enerjisi təchizatının yüksək səviyyadə təmin olunması da xüsusi əhəmiyyət kəsb edir.
“Şabran Elektrik Şəbəkəsi”ndən “Azərenerji” ASC-nin Mətbuat xidmətinə verilən məlumatda bildirilir ki, rayonun elektrik enerjisi təchizatı 110 kilovoltluq I «Xaçmaz» və «Çarxı» hava xətləri, 110/35/10 kV-lik “Şabran” və “Rəhimli” yarımstansiyaları vasitəsilə həyata keçirilir.
“Şabran” yarımstansiyasının 16 MVA-lıq 1 nömrəli transformatorunun 110 kV-lik avadanlıqların yerinə müasir tipli eleqaz açarı və cərəyan transformatorları quraşdırılıb. Ayırıcı və boşaldıcılar təmir işlərindən sonra yeni özüllər üzərində montaj edilib. 16 MVA-lıq 1 və 2 nömrəli transformatorlarda 2 ədəd 10 kV-lik giriş vakuum açarı quraşdırılıb. Eyni zamanda, yarımstansiyanın 10 kV-lik yağ açarları cari təmir olunub.
"Rəhimli” yarımstansiyasında isə 6,3 MVA gücündə transformator cari, 10 kV-lik «Təzəkənd» hava xəttinin (HX) yağ açarı isə əsaslı təmir edilib.
Qeyd edək ki, 35 kV-lik “Pirəbədil” yarımstansiyasındakı 1,0 MVA gücündə transformatorun 3 ədəd 35 kV-lik boşaldıcıları yenisi ilə əvəz edilib və 10 kV-lik yağ açarları cari təmir olunub.
“Zeyvə” yarımstansiyasındakı 1,6 MVA gücündə transformatorda «Zeyvə» hava xəttini «Azneft» hava xəttindən ayıran 35 kV-lik ayırıcı quraşdırılıb. Bundan başqa, yarımstansiyada cari təmir işləri aparılıb.
Ümumiyyətlə, 2012-ci il ərzində şəbəkə ərazisində 6 ədəd transformator məntəqəsində əsaslı təmir işləri görülüb, eyni gərginlikdə olan 116 ədəd transformator məntəqəsində cari təmir işləri aparılıb, «Şabran» yarımstansiyasından qidalanan 10 kV-lik «Beşmərtəbə» hava xəttində də əsaslı təmir işləri aparılıb.
Texnoloji itkiləri azaltmaq və transformatorlardan səmərəli istifadə etmək məqsədilə Leyti, Maytablı kəndlərində, şəhərin M.Əsədov küçəsində transformatorlar dəyişdirilib, bəzi yerlərdə naqillər yenisi ilə əvəzlənib.
Yeri gəlmişkən, bu il şəbəkədə görüləcək işlərin miqyası genişdir. Buraya «Rəhimli» yarımstansiyasına «Xaçmaz» hava xəttindən xətt çəkilməklə 2-ci transformatorun və eleqaz açarlarının quraşdırılması, «Dağbilici» və «Qorğan» hava xətlərində 10 kV-lik yağ açarının vakuum açarı ilə dəyişdirilməsi, «Çaraq», «Xəlfələr» və «Çölquşçu» hava xətlərində ümumilikdə 26 kilometr uzunluğunda əsaslı təmir işlərinin aparılması, itkilərin azaldılması məqsədilə Rəhimli kəndində 160 kVA-lıq transformatorun 250 kVA, Acıqaraqaşlı kəndində 250 kVA-lıq transformatorun 160 kVA-lıqla əvəz edilməsi daxildir.