Naftalan nefti ilə  müalicə üçün burada  kifayət qədər  sanatoriya fəaliyyət göstərir. Müalicəxanalara respublika daxilindən, MDB məkanından və xarici dövlətlərdən  hər il çoxlu sayda  pasient müraciət edir. Təbii ki, onların öz ölkələrinə razı qayıtmaları üçün müalicə ocaqlarının elektrik enerjisi ilə normal qaydada təmin olması çox vacibdir.

Yola saldığımız 2012-ci ili “Naftalan  Elektrik Şəbəkəsi” üçün də uğurlu saymaq  olar. «Mingəçevir REŞ» MMC-nin struktur  tərkibinə daxil olan şəbəkədə  son illər yenidənqurmaya imza atılıb. Elektrik enerjisindən istifadə  qayda­larının  tələblərinə əməl edilməklə istehlakçılara keyfiyyətli və fasiləsiz  elektrik enerjisi verilib.

“Naftalan” EŞ-dən “Azərenerji” ASC-nin Mətbuat xidmətinə daxil olan məlumata görə, 2012-ci ildə  şəbəkədə  aparılan məqsəd­yönlü işlərin nəticəsidir ki,  burada itirilmiş enerji yoxdur. Enerji  israfçılığına qarşı  mütəmadi tədbirlər görülür.

110 kV-lik “Naftalan”  yarımstansiyasında qurğu və avadanlıqların,  xətlərin uzunömürlüyünü və dayanıqlığını artırmaq üçün daim  profilaktiki işlər həyata keçirilir. Payız-qış  mövsümü üçün nəzərdə tutulan tədbirlər planı tam yerinə  yetirilib. Ötən il  sözügedən  yarımstansiyada doqquz ədəd  10 kilovoltluq, beş ədəd isə 35 kilovoltuq yağ açarı əsaslı təmirdən çıxarılmış,  açarlara  transformator yağı əlavə edilmişdir. 2 nömrəli 16 MVA-lıq transformator da cari təmir olunan avadanlıqlar sırasındadır.

Mənbəyə istinadən qeyd edək ki, Naftalan şəhərində  on səkkiz ədəd  və Qaşaltı kəndində iki ədəd transformator məntəqəsində  əsaslı təmir işləri aparılıb. 0,4 kV-lik EVX-də altı km, 10 kV-lik EVX-də isə  on iki  km-lik hissədə cari təmir işləri görülüb, boşalmış naqillər dartılıb, əyilmiş dayaqlar  düzəldilib və xəttə mane olan  ağaclar  kəsilib.

Sonda onu da qeyd edək ki, “Naftalan Elektrik Şəbəkəsi”nin kollektivi cari ilin ilk ayından  işə yüksək əhval-ruhiyyə ilə  başlayıblar. Onlar daha yüksək  keyfiyyətli  xidmət göstərməyi  qarşılarına məqsəd qoyublar.