“Azərenerji” ASC-nin Mətbuat xidmətinə “Şəmkir SES Silsiləsi”ndən daxil olan məlumata görə, kollektiv cari ilin doqquz ayı ərzində üzərinə düşən vəzifənin öhdəsindən layiqincə gəlib. Bu müddətdə “Şəmkir” SES-də 549,5 milyon kilovat-saat elektrik enerjisi istehsal edilib. “Yenikənd” SES-də isə cari ilin 9 ayı ərzində 234,8 mln. kilovat-saat elektrik enerjisi istehsal edilib.

Mənbəyə istinadən qeyd edək ki, hər iki stansiyada sentyabr ayında da uğurlu nəticə əldə edilib. Belə ki, sözügedən ayda “Şəmkir” SES-də 36,8 mln. kilovat-saat, “Yenikənd” SES-də isə 15,7 mln. kilovat-saat elektrik enerjisi istehsal edilib.

Məlumat verildiki kimi, “Şəmkir” SES-də iki hidroaqreqat saz vəziyyətdə istismar olunur. Hər iki hidroaqreqat cari təmirdən çıxarılıb. Stansiyanın kran təsər­rüfatındakı üç ədəd kətilli və iki ədəd körpülü kran saz haldadır. İrili-xırdalı 13 transformator, 8 ədəd kompressor qurğusu normal vəziyyətdədir. SES-də olan avadanlıqlarda, qurğularda təmir işləri və profilaktik yoxlamalar davam etdirilir. 2012-ci ilin yaz-yay sel sularının qəbulu və ötürülməsi normal başa çatıb.

“Yenikənd” SES-dəki dörd hidroaqreqatdan üçü cari təmir olunub. Buradakı iki ədəd kətilli və bir körpülü kran, beş ədəd 110 kV-lik eleqaz açarı, on iki ədəd müxtəlif güclü transformator tam işlək vəziyyətdədir. Təmir-bərpa işləri təsdiq olunmuş plan-qrafik üzrə davam etdirilir. Cari ilin yaz-yay sel sularının qəbulu və ötü­rülməsində də problem ya­şa­n­mayıb.

Sonda onu da qeyd edək ki, payız-qış mövsümünə dair təsdiqlənmiş tədbirlər planı, de­mək olar ki, oktyabrın sonuna kimi həyata keçiriləcək. Ava­danlıqlara texniki xidmət hər iki stansiyada baş mühəndisin təsdiq etdiyi qrafiklər üzrə mütəxəssislər tərəfindən aparılır. Xidmətlər təlimatlara uyğun yerinə yetirilir.

Xatırladaq ki, Silsiləyə  “Şəmkir” və “Yenikənd” SES-ləri daxildir.